جاڭالىقتار
يسلام ابىشەۆ سۋ تاسقىنىنا قاتىستى وي ءبولىستى
Qasqa Jol YouTube ارناسى ءوزىنىڭ كەزەكتى شىعارىلىمىن كوكتەمگى سۋ تاسقىنى ماسەلەسىنە ارنادى. قوناقتا مەملەكەت جانە قوعام قايراتكەرى, سۋ رەسۋرستارى كوميتەتىنىڭ بۇرىنعى توراعاسى يسلام الماحان ۇلى ابىشەۆ بولىپ, تاسقىننىڭ الدىن الۋعا قاتىستى ءوز تاجىريبەسىن ءبولىستى, — دەپ حابارلايدى qandastar.kz
يسلام ابىشەۆتىڭ ايتۋىنشا, كەز كەلگەن ماسەلەنىڭ شەشىمىن تابۋعا بولادى. تەك دۇرىس جوسپار قۇرىپ, ناقتى ارەكەت ەتۋ كەرەك.
«كۇن بىردەن 25 گرادۋسقا جىلىپ كەتسە, ءسوزسىز سۋ تاسقىنى بولادى. بىراق ونداي توتەننەن ساقتاسىن, ولاي بولا قالسا ءبىز ەشتەڭە جاساي الماي قالامىز. ەڭ ۇلكەن ماسەلەلى ايماق — شىعىس قازاقستان وبلىسى. كەز كەلگەن سۋ تاسقىنىنىڭ الدىن الۋعا بولادى. كەلگەن سۋدىڭ بيىكتىگى 2-3 مەتر بولسا, وندا ونى توقتاتۋ قيىن. بىلتىرعى كەلگەن تاسقىننىڭ بيىكتىگى 1-1,5 مەتردەن اسقان جوق. وندايدا سەن 2 مەترلىك دامبى ىستەپ قوي, بولدى. وسىنى 10-20 جىل بۇرىن قولعا الساق, مۇنداي جاعدايلار بولماس ەدى. 2012 جىلى كوميتەتكە توراعا بولىپ كەلگەنىمدە, تاسقىنعا قالاي توتەپ بەرۋدىڭ بارلىق جولى ايتىلىپ, قاراستىرىلعان. 2016 جىلى قاي جەردە قاۋىپ بولسا, سول جەردىڭ بارىمەن اينالىسقانبىز», — دەدى باعدارلاما قوناعى.
سونىمەن قاتار, قوعام قايراتكەرى سۋ تاسقىنى ەڭ قاۋىپتى ايماقتى اتاپ ءوتتى.
«سۋ تاسقىنىنىڭ الدىن الۋ ءۇشىن قۇبىرلارعا ءمان بەرۋ كەرەك. ىستىق سۋمەن ىشىنە قاتقان مۇزدى ەرىتىپ, سۋ وتكىزۋ قابىلەتىن كوتەرىپ وتىرعان ءجون. ول قۇبىرلار سۋ وتكەن سايىن قاتا بەرەدى, وسى تۇستا قاتە جىبەرمەۋىمىز كەرەك. كۇن سايىن سۋ وتەتىن قۇبىرلاردى سول جەرگە بارىپ تەكسەرىپ وتىرعان دۇرىس. وسىدان ءۇش كۇن بۇرىن بارىپ تەكسەرىپ كەتكەنمىن دەگەن بولمايدى. قازىرگى شقو-عا بارعان اكىم نۇرىمبەت ساقتاعانوۆ وتە تاجىريبەلى ازامات. ءبىز ايتىپ وتىرعان اقىلدى ول ازامات بىزدەن دە ارتىق بىلەدى», — دەدى ول.
