Islam Ábishev sý tasqynyna qatysty oı bólisti

Qasqa Jol YouTube arnasy óziniń kezekti shyǵarylymyn kóktemgi sý tasqyny máselesine arnady. Qonaqta memleket jáne qoǵam qaıratkeri, Sý resýrstary komıtetiniń burynǵy tóraǵasy Islam Almahanuly Ábishev bolyp, tasqynnyń aldyn alýǵa qatysty óz tájirıbesin bólisti, — dep habarlaıdy qandastar.kz

Islam Ábishevtiń aıtýynsha, kez kelgen máseleniń sheshimin tabýǵa bolady. Tek durys jospar quryp, naqty áreket etý kerek.

«Kún birden 25 gradýsqa jylyp ketse, sózsiz sý tasqyny bolady. Biraq ondaı tótennen saqtasyn, olaı bola qalsa biz eshteńe jasaı almaı qalamyz. Eń úlken máseleli aımaq — Shyǵys Qazaqstan oblysy. Kez kelgen sý tasqynynyń aldyn alýǵa bolady. Kelgen sýdyń bıiktigi 2-3 metr bolsa, onda ony toqtatý qıyn. Byltyrǵy kelgen tasqynnyń bıiktigi 1-1,5 metrden asqan joq. Ondaıda sen 2 metrlik damby istep qoı, boldy. Osyny 10-20 jyl buryn qolǵa alsaq, mundaı jaǵdaılar bolmas edi. 2012 jyly komıtetke tóraǵa bolyp kelgenimde, tasqynǵa qalaı tótep berýdiń barlyq joly aıtylyp, qarastyrylǵan. 2016 jyly qaı jerde qaýip bolsa, sol jerdiń bárimen aınalysqanbyz», — dedi baǵdarlama qonaǵy.

Sonymen qatar, qoǵam qaıratkeri sý tasqyny eń qaýipti aımaqty atap ótti.

«Sý tasqynynyń aldyn alý úshin qubyrlarǵa mán berý kerek. Ystyq sýmen ishine qatqan muzdy eritip, sý ótkizý qabiletin kóterip otyrǵan jón. Ol qubyrlar sý ótken saıyn qata beredi, osy tusta qate jibermeýimiz kerek. Kún saıyn sý ótetin qubyrlardy sol jerge baryp tekserip otyrǵan durys. Osydan úsh kún buryn baryp tekserip ketkenmin degen bolmaıdy. Qazirgi ShQO-ǵa barǵan ákim Nurymbet Saqtaǵanov óte tájirıbeli azamat. Biz aıtyp otyrǵan aqyldy ol azamat bizden de artyq biledi», — dedi ol.