جاڭالىقتار
يسلام دامۋ بانكى قازاقستانداعى ينفراقۇرىلىمدىق جوبالاردى قولداۋعا شامامەن $2 ملرد بولەدى
فوتو: قر پرەمەر-ءمينيسترىنىڭ رەسمي اقپاراتتىق رەسۋرسى
OPEC حالىقارالىق دامۋ قورى ۇيىمداستىرعان فورۋمدا قازاقستان رەسپۋبليكاسى پرەمەر-ءمينيسترىنىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ اراب كوورديناتسيالىق توبىنا كىرەتىن يسلام دامۋ ينستيتۋتتارىمەن بىرقاتار ەكىجاقتى كەزدەسۋلەر وتكىزدى. سونداي-اق, قازاقستان رەسپۋبليكاسىنىڭ ۇكىمەتى مەن يسلام دامۋ بانكى اراسىنداعى نەگىزدەمەلىك باعدارلامالىق كەلىسىمگە قول قويدى,- دەپ حابارلايدى qandastar.kz ءتىلشىسى قر پرەمەر-ءمينيسترىنىڭ رەسمي اقپاراتتىق رەسۋرسىنا سىلتەمە جاساپ.
كەلىسىم بيىل سۋ شارۋاشىلىعى جانە كولىك سالالارىنداعى ينفراقۇرىلىمدىق جوبالاردى جۇزەگە اسىرۋ ءۇشىن ۇزاقمەرزىمدى ينۆەستيتسيالار تارتۋ تۋرالى بۇعان دەيىن قول جەتكىزىلگەن كەلىسىمدەردى بەكىتتى. وسى ماقساتتا يسلام دامۋ بانكى $2 ملرد دەيىن قارجى بولەدى.
سۋ رەسۋرستارى جانە يرريگاتسيا مينيسترلىگى بيىل قارجىلاندىرۋعا دايىن 16 جوبانى دايىندادى. ولاردىڭ ىشىندە سۋ قويمالارىن, بوگەتتەردى, يرريگاتسيالىق كانالداردى, كونتررەتتەۋشىلەردى جانە ىلەسپە ينفراقۇرىلىمدى سالۋ جانە رەكونسترۋكتسيالاۋ جوبالارى بار. كولىك مينيسترلىگى ۇزىندىعى 500 شاقىرىمنان استام رەسپۋبليكالىق ماڭىزى بار اۆتوجولداردى رەكونسترۋكتسيالاۋ جانە سالۋ بويىنشا 4 جوبانى ۇسىندى.
كەلىسىم تابىستى ىسكە اسىرۋ جانە العا قويىلعان ماقساتتارعا قول جەتكىزۋ ءۇشىن بىرلەسكەن جوبالاردىڭ ورىندالۋ بارىسىنا تۇراقتى كونسۋلتاتسيالار مەن مونيتورينگ جۇرگىزۋدى كوزدەيدى.
