يسلام دامۋ بانكى قازاقستاننىڭ سۋ سالاسىن دامىتۋعا مۇددەلى

فوتو: primeminister.kz

تاراپتار باكۋدە ءوتىپ جاتقان بۇۇ-نىڭ كليماتتىڭ وزگەرۋى جونىندەگى كونفەرەنتسياسىندا (COP29) ءتيىستى كەلىسىمگە قول قويدى. پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ بۇل يسلام دامۋ بانكىنىڭ تاريحىنداعى قارجىلاندىرعان ەڭ كولەمدى جوباسى ەكەنىن اتاپ ءوتتى, دەپ جازادى qandastar.kz

سونىمەن قاتار يسلام دامۋ بانكى (يدب) قازاقستاننىڭ سۋ سالاسىن دامىتۋعا $3,5 ملن كولەمىندە وتەۋسىز گرانت ءبولدى.

سونداي-اق يدب سۋ رەسۋرستارى جانە يرريگاتسيا مينيسترلىگى ازىرلەگەن «كليمات وزگەرىسىنە ءتوزىمدى سۋ رەسۋرستارىن دامىتۋ» جوباسىن ىسكە اسىرۋعا قاتىسادى. بۇعان دەيىن تاراپتار جوبانىڭ ءبىرىنشى كەزەڭى بويىنشا كەلىسسوزدەر حاتتاماسىنا قول قويعان بولاتىن.

قارجىلاندىرىلاتىن جوبانىڭ ءبىرىنشى كەزەڭى استانا سۋ قويماسىن تولىقتىرۋ جونىندەگى جوبانى قوسا العاندا, 4 جاڭا سۋ قويماسىن سالۋدى جانە جۇمىس ىستەپ تۇرعان 4 سۋ قويماسىن رەكونسترۋكتسيالاۋدى, 115 كانالدى رەكونسترۋكتسيالاۋدى جانە كۇردەلى جوندەۋدى قاراستىرادى. قۇرىلىس جۇمىستارى اقمولا, الماتى, جامبىل, قىزىلوردا, تۇركىستان, باتىس قازاقستان, جەتىسۋ وبلىستارىندا جانە استانا قالاسىندا جۇرگىزىلەدى.

بۇدان باسقا, جوبا يدب مەن مينيسترلىك اراسىنداعى قازاق سۋ شارۋاشىلىعى عىلىمي-زەرتتەۋ ينستيتۋتىنىڭ سۋ جانە وزەن باسسەيندەرىنىڭ ماسەلەلەرىن زەردەلەۋدەگى تەحنيكالىق ىنتىماقتاستىقتى, سونداي-اق سۋ رەسۋرستارىنىڭ اقپاراتتىق-تالداۋ ورتالىعى ءۇشىن ەرتە دەن قويۋ جۇيەلەرىن ەنگىزۋدى باعالاۋدى كوزدەيدى.

ونىڭ ىشىندە «قازسۋشار» رەسپۋبليكالىق مەملەكەتتىك كاسىپورنىن تەحنيكالىق جاراقتاندىرۋ جانە سۋ رەسۋرستارىن باسقارۋدى جەتىلدىرۋ ءۇشىن اۆتوماتتاندىرۋ ورتالىعىن سالۋ جوسپارلانۋدا.

«مەملەكەت باسشىسى سۋ سالاسىنا ينۆەستيتسيا تارتۋدىڭ ماڭىزدىلىعىن بىرنەشە رەت اتاپ كورسەتتى. ءبىزدىڭ الدىمىزدا سۋ ينفراقۇرىلىمىن جاڭعىرتۋ جانە بولىپ جاتقان كليماتتىق وزگەرىستەرگە بەيىمدەۋ مىندەتى تۇر. يسلام دامۋ بانكى سياقتى بەدەلدى ينستيتۋتتىڭ قارجىلاندىرۋى ەلىمىزگە دەگەن جوعارى سەنىمدى, جۇرگىزىلىپ جاتقان ينۆەستيتسيالىق ساياسات پەن الەۋمەتتىك-ەكونوميكالىق رەفورمالاردى كۋالاندىرادى», — دەپ اتاپ ءوتتى نۇرلان بايبازاروۆ.