جاڭالىقتار
«ءيتتى اتقانداي اتىپ تاستادى»: اقمولا وبلىسىندا MMA باپكەرلەرىن ايۋاندىقپەن ءولتىرىپ كەتتى
فوتو: Orda.kz
اقمولا وبلىسىنا قاراستى اقكول قالاسىندا ەكى ادام ايۋاندىقپەن ءولتىرىلدى. ولار – ارالاس جەكپە-جەك باپكەرلەرى. مارقۇمنىڭ تۋىستارى كۇدىكتىلەر جازادان قۇتىلىپ كەتە مە دەپ قورقادى. سپورتشىنىڭ اناسى qandastar.kz سايتىندا وقيعانىڭ ءمان-جايىن باياندادى.
قاندى قىلمىس 11 تامىزدىڭ تۇنىندە بولعان. پوليتسيا وقيعانىڭ قالاي جانە نە سەبەپتى بولعانىن قۇپيا ۇستاپ وتىر. بەلگىلىسى – كۇدىكتى بىرنەشە ەر ادام ۇستالعان. ولاردىڭ ۇستىنەن «بىرنەشە ادامنىڭ الدىن الا ءسوز بايلاسىپ ادام ءولتىرۋى» بابى بويىنشا قىلمىستىق ءىس قوزعالعان.
قايتىس بولعان قايىربەك سابيەۆتىڭ اناسىنىڭ ايتۋىنشا, ونىڭ ۇلى دوسىمەن بىرگە ءدامحانادا وتىرعاندا كۇدىكتىلەردىڭ توبىمەن سوزگە كەلگەن.
«ەكەۋى دە ىشپەيدى, ەكەۋى دە سپورتشى, دوستار جانە باپكەرلەر. اقكولدە ءوز مەكتەبى بار. ەكەۋى جاي عانا دەمالىپ وتىرعان, ەشكىمگە كەدەرگى كەلتىرمەگەن. سول كەزدە ولارعا ەكى جىگىت كەلىپ تيىسە باستاعان. ولار جەرگىلىكتى بۇزىقتار, نە ىستەسە دە جازالانبايدى. مەنىڭ ۇلىم ءوزىن قورعاي الاتىن, سوندىقتان ونى اۋىل سىرتىنا شىعىپ, ءيتتى اتقانداي اتىپ تاستادى», – دەيدى مارقۇمنىڭ اناسى.
قايتىس بولعان ەكى جىگىتتى اقكولدە كوپشىلىك تانىعان. ولار جاستايىنان سپورتپەن شۇعىلدانىپ, ەسەيگەن سوڭ بىلگەن-تۇيگەنىن جاستارعا ۇيرەتە باستاعان.
«مەن قازىر كىشى ۇلىم مەن جيەنىم ءۇشىن ۋايىمدامىن. ويتكەنى, جيەنىم كۋاگەر رەتىندە شاقىرىلىپ, بولعان جايتتىڭ ءبارىن پوليتسياعا ايتىپ بەردى», – دەيدى گۇلجان بۋرگەگۋلوۆا.
پوليتسيا تەرگەۋدىڭ قۇپيالىعىنا بايلانىستى مارقۇمداردىڭ تۋىستارىنا وقيعانىڭ ءمان-جايىن ايتپاۋدى بۇيىرىپتى.
كۇدىكتىلەر ايماقتاعى بەدەلدى ازاماتتاردىڭ بالالارى بولعاندىقتان ولار جازادان قۇتىلىپ كەتە مە دەپ الاڭدايدى مارقۇمداردىڭ تۋىستارى.
«بۇل شيبورىلەر وتە كوپ, نە ىستەسەك تە جازالانبايمىز دەپ ويلايدى. ەشقاشان جالعىز جۇرمەيدى, ۇنەمى توپ بولىپ جۇرەدى. بۇكىل اقكول ولاردى تانيدى, ءبارى قورقادى. مەنىڭ ۇلىم وتە ءادىل ادام ەدى, بالكىم سونىسى تۇبىنە جەتكەن شىعار», – دەدى قايىربەكتىڭ اناسى.
