ىزدەۋدە جۇرگەن قاراعاندىلىق ەكس-سۋديانىڭ رەسەي تولقۇجاتىن يەلەنگەنى بەلگىلى بولدى

فوتو: qamkor

قاراعاندىلىق بۇرىنعى سۋديا كارلىعاش تاتكەەۆا رەسەي تولقۇجاتىن يەلەنگەنى بەلگىلى بولدى, دەپ حابارلايدى qandastar.kz Dalanews.kz-كە سىلتەمە جاساپ.

بۇل تۋرالى «ۆىحود ك پراۆدە» Telegram-ارناسى مالىمدەدى.

«اسا ءىرى كولەمدەگى الاياقتىق جاسادى دەپ ايىپتالىپ, ىزدەۋ جاريالانعان بۇرىنعى قازاقستاندىق سۋديا كورشى ەل اۋماعىندا جاسىرىنىپ ءجۇرۋى ابدەن مۇمكىن.

جاريالانعان دەرەكتەردەن تاتكەەۆانىڭ رەسەي ازاماتتىعىن قاشان العانى بەلگىسىز. دەگەنمەن ونىڭ سۋرەتى بازاداعى رەسەيلىك قۇجاتتان الىنعانى انىق كورىنەدى. بۇل پاسپورتتاعى فوتوسۋرەت شەتتەرىندە ورنالاسقان ارنايى بەلگىلەر ارقىلى دالەلدەنەدى», – دەلىنگەن حابارلامادا.

تاتكەەۆاعا ىزدەۋ جاريالانعان ساتتە جاعدايدى جاقسى بىلەتىن دەرەككوزدىڭ ايتۋىنشا, ول بىرەۋدىڭ سوت داۋىن شەشىپ بەرۋگە ۋادە ەتىپ, 500 مىڭ دوللار العان. بىراق ۋادەسىن ورىنداي الماي, اقشانى دەلدالدار ارقىلى قولحاتپەن قايتارعان. الايدا دەلدالدار باستاپقىدا اقشا بەرگەن ادامعا تولىق سومانى قايتارماعاندىقتان, ول پوليتسياعا ارىز تۇسىرگەن. مۇنى ەستىگەن سوڭ, تاتكەەۆا جاسىرىنعان.

ەسكە سالايىق, بۇعان دەيىن قاراعاندى وبلىسىنىڭ مامانداندىرىلعان اۋدانارالىق ەكونوميكالىق سوتىنىڭ بۇرىنعى سۋدياسى قارلىعاش تاتكەەۆاعا اسا ءىرى كولەمدە الاياقتىق جاسادى دەگەن كۇدىكپەن ىزدەۋ جاريالانعان ەدى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى دانيار بيعايداروۆ مالىمدەدى.

ۆەدومستۆونىڭ مالىمەتىنشە, ەكس-سۋدياعا قاتىستى قىلمىستىق كودەكستىڭ 190-بابى 4-بولىگى («الاياقتىق») بويىنشا ءىس قوزعالعان. قارلىعاش تاتكەەۆا بىرنەشە ادامنىڭ سەنىمىنە كىرىپ, ءىرى كولەمدە قارجى يەمدەنگەن بولۋى مۇمكىن دەگەن بولجام بار.

سىبايلاس جەمقورلىققا قارسى قىزمەت تاتكەەۆانىڭ ناقتى قايدا ەكەنىن بىلەتىن ازاماتتارعا ۇندەۋ جاساپ, كەز كەلگەن اقپارات ءۇشىن انونيمدىككە جانە سىياقى تولەۋگە كەپىل بەرىپ وتىر.

ايتا كەتەيىك, قارلىعاش تاتكەەۆا جوعارعى سوتتى قازىرگى سەناتور جاقىپ اسانوۆ باسقارعان كەزەڭدە جوعارعى سوت توراعاسىنىڭ ازاماتتىق ىستەر جونىندەگى كەڭەسشىسى بولعان. تاتكەەۆا ءوزىنىڭ سوت ورگاندارىنداعى جىلدارىندا  قاراعاندى ​​وبلىسىنىڭ مامانداندىرىلعان اۋدانارالىق ەكونوميكالىق سوتىنىڭ سۋدياسى, سونداي-اق استانا سوتىنىڭ سۋدياسى بولىپ قىزمەت اتقارعان.

قازىرگى تاڭدا قۇقىق قورعاۋ ورگاندارى كۇدىكتىنىڭ جۇرگەن جەرىن انىقتاۋ جانە ونى جاۋاپكەرشىلىككە تارتۋ باعىتىندا جەدەل ىزدەستىرۋ شارالارىن جۇرگىزىپ جاتىر.