يزرايل ليۆانعا دا شابۋىل جاسادى

يزرايل قورعانىس ارمياسى (تساحال) يرانعا باعىتتالعان شابۋىلداردىڭ جاڭا تولقىنى اياسىندا ليۆان اۋماعىنا دا سوققى بەرگەنىن حابارلادى. بۇل تۋرالى مالىمەت ۆەدومستۆونىڭ رەسمي Telegram-ارناسىندا جاريالاندى, دەپ حابارلايدى BAQ.KZ.

ءباسپاسوز قىزمەتىنىڭ مالىمدەۋىنشە, شابۋىل ليۆاننىڭ وڭتۇستىگىندەگى حوۋل قالاسى ماڭىندا جۇزەگە اسىرىلعان. ولار «حەزبوللا» ۇيىمىنىڭ مۇشەسىن نىساناعا العان. تساحال دەرەكتەرىنە سايكەس, وپەراتسيا ءساتتى اياقتالعان. دەگەنمەن, ۇيىم وكىلىنىڭ اتى-ءجونى, لاۋازىمى مەن وپەراتسيانىڭ باسقا دا ەگجەي-تەگجەيلەرى ازىرگە جاريا ەتىلگەن جوق.

بۇعان دەيىن ءيزرايلدىڭ يران اۋماعىنا جاساعان سوققىلارى سالدارىنان كەم دەگەندە 1 800 ادام زارداپ شەككەنى حابارلانعان. ولاردىڭ كوپشىلىگى – بەيبىت تۇرعىندار. سونىمەن قاتار, 16 ماۋسىم كۇنى يزرايل كۇشتەرى يراننىڭ مەملەكەتتىك تەلەراديوكورپوراتسياسىنىڭ شتاب-پاتەرىنە سوققى بەرگەن. بۇل شابۋىل تىكەلەي ەفير كەزىندە جۇزەگە اسقان.

اتالعان وقيعالارعا بايلانىستى رەسەيدىڭ سىرتقى ىستەر مينيسترلىگى مالىمدەمە جاساپ, ءيزرايلدىڭ ارەكەتىن ايىپتادى. مينيسترلىك «يزرايل ءوزىن جازاسىز سەزىنىپ وتىر» دەپ اتاپ ءوتتى.