جاڭالىقتار
«يوۋ, ورىستار» دەگەن ءاندى شىرقاعان الماتىلىق بەلسەندى 10 تاۋلىككە قاماۋعا الىندى
فوتو: اشىق دەرەككوز
الماتىنىڭ اكىمشىلىك سوتى بەلسەندى ماريا كوچنەۆانى مۋزىكالىق فەستيۆالدە «يوۋ, ورىستار» دەگەن ءاندى شىرقاعانى ءۇشىن 10 تاۋلىككە قاماۋعا الدى. بۇل تۋرالى Stan.kz اقپارات اگەنتتىگى حابارلايدى.
سوت كوچنەۆانى ۇساق بۇزاقىلىق جاساعانى ءۇشىن كىنالى دەپ تاپتى. ونىڭ ۇستىنەن ۇساق بۇزاقىلىق بابى بويىنشا ءىس قوزعالىپ, اكىمشىلىك سوتقا جىبەرىلدى. باپ بويىنشا 10 اەك (36,9 مىڭ تەڭگە) كولەمىندە ايىپپۇل سالۋ نەمەسە ون تاۋلىككە دەيىن اكىمشىلىك قاماققا الۋ قاراستىرىلعان.
«مەن ءوز سوزىمدە ەشقانداي جامان نيەت ايتقان جوقپىن. بۇل شىن مانىندە TikTok جەلىسىندە ترەندتەگى ءان. مەن ونىڭ مازمۇنىن بىلمەيمىن», – دەدى كوچنەۆا.
ايتا كەتەيىك, بۇعان دەيىن الماتى قالاسىنىڭ تۇرعىنى ماريا كوچنەۆا فريستايل رەپتە رەسەيلىكتەرگە قارسى ءان شىرقاعانى ءۇشىن المالى اۋداندىق ىشكى ىستەر بولىمىنە شاقىرىلعان ەدى.
قىزدىڭ دوسى تەمىرلان ەڭسەبەكتىڭ سوزىنشە, ماريانى پوليتسيا دەپارتامەنتىنە سوعىسقا قارسى ءان شىرقاعانى ۇشىن شاقىرعان.
ەڭسەبەك بۇل ءاندى كوچنەۆا ەكەۋى ۋكرايناداعى سوعىستى ەسكە ءتۇسىرۋ ءۇشىن ويلاپ تاپقانىن ايتقان ەدى.
كوچنەۆا ورىنداعان ءان ۋكراينادا سوعىس باستالعاننان كەيىن ترەندكە اينالعان. باق-تا تانىمال بولعانى سونشا, ءان بارلىق الەۋمەتتىك جەلىلەردە ءبىرىنشى ورىنعا يە بولعان.
