مادەنيەت
Junior Eurovision: ەرجان ماكسيمگە پولشاداعى قانداستارىمىز قولداۋ بىلدىرۋدە
«Junior Eurovision-2019» بايقاۋىنىڭ باستالۋىنا ساناۋلى كۇندەر قالدى, دەپ حابارلايدى قازاقپارات «حابار 24» تەلەارناسىنا سىلتەمە جاساپ.
قاتىسۋشىلاردىڭ بارلىعى پولشانىڭ گليۆيتسە قالاسىنا كەلىپ قويدى. ۇيىمداستىرۋشىلار دا دايىندىققا قىزۋ كىرىسىپ كەتتى. ولاردىڭ ايتۋىنشا, بيىلعى بايقاۋ بىلتىر مينسك قالاسىندا وتكەن شارادان كەم تۇسپەيدى.
«ءار بايقاۋدىڭ ءوز ەرەكشەلىگى بار. ءبىز بيىلعى شارانى قابىلداي وتىرىپ, ءوزىمىزدىڭ ەلىمىزدى, ياعني پولشانى الەمگە تانىتۋ مۇمكىندىگىنە يە بولىپ وتىرمىز. ءبىزدىڭ شوۋ ءبارىنىڭ كوڭىلىنەن شىعادى دەپ ويلايمىز», – دەيدى Junior Eurovision-2019 ۇيىمداستىرۋشىسى اگاتا كونارسكا.
ۇيىمداستىرۋشىلار ءتۇرلى ەلدەن جينالعان جاس دارىنداردى ءبىر-بىرىنە تانىستىرۋ جاعىنا دا ەرەكشە كوڭىل بولگەن. وسى رەتتە گليۆيتسەدە كۇن سايىن كەزدەسۋلەر وتكىزىلۋدە. قازاقستان اتىنان ونەر كورسەتەتىن ەرجان ماكسيمگە ەلىمىزدەن كەلگەن دەلەگاتسيادان بولەك, پولشادا تۇراتىن وتانداستارىمىز دا قىزۋ قولداۋ ءبىلدىرىپ وتىر.
«بايقاۋدىڭ پولياك جەرىندە ءوتۋى, كەزدەيسوق ەمەس دەپ ويلايمىن. ءبىر كەزدەرى ءبىزدىڭ ايگىلى امىرە قاشاۋباەۆ اتامىز كەلگەن سياقتى. وسى ەۋروپا جۇرتشىلىعىنا, ونىڭ ىشىندە تاعدىرلاس پولياك جۇرتشىلىعىنا ءبىزدىڭ اندەرىمىزدى, مادەنيەتىمىزدى ىنىشەگىمىز ەرجان تانىستىرادى دەپ سەنەمىن. جانە دە قازاقستاننىڭ نامىسىن وسى ءبىر ءان بايقاۋىندا ۇلكەن ابىرويمەن قورعايتىندىعىنا كامىل سەنىمدىمىز»,- دەيدى قازاق دياسپوراسىنىڭ وكىلى جاندوس كارىنباەۆ.
ەسكە سالساق, ورالدىق ءانشىنىڭ اتالمىش حالىقارالىق بايقاۋعا قاتىساتىنىن بۇعان دەيىن حابارلاعان بولاتىنبىز. 10 قازان كۇنى ول الماتىدا ءباسپاسوز ءماسليحاتىن وتكىزىپ, بايقاۋعا ارنالعان «ارمانىڭنان قالما» ءانىنىڭ بەينەبايانىن كورسەتتى. ونىڭ رەجيسسەرى – الەكساندر فلومبويم, پروديۋسەرى – سەرگەي رۋتسكي. ءاننىڭ اۆتورلارى – حاميت شانعاليەۆ, دانيار الدابەرگەنوۆ جانە تيمۋر بالىمبەتوۆ.
15 قاراشا كۇنى نۇر-سۇلتاندا وتكەن ءباسپاسوز ءماسليحاتىندا ەرجان ساحناعا نەشىنشى نومىرمەن شىققىسى كەلەتىنىن ايتتى. «حابار» اگەنتتىگىنىڭ باسقارما توراعاسى ەرلان بەكحوجيننىڭ سوزىنشە, بيىل بايقاۋعا نەگىزىنەن ەۋروپالىق وداق ەلدەرىنىڭ وكىلدەرى قاتىسادى.
ازەربايجان مەن تۇركيا ءوز كانديداتتارىن ۇسىنباعاندىقتان, ەرجان بۇكىل تۇركى الەمنىڭ اتىنان ونەر كورسەتەتىن بولادى. 18 قاراشا كۇنى ەرجان الماتى اۋەجايىنان پولشاعا ۇشىپ شىقتى. ونى تۋىسقاندارى مەن جانكۇيەرلەر شىعارىپ سالدى.
«Junior Eurovision»-ءنىڭ فينالدىق كەزەڭى 24 قاراشادا وتەدى. ونى «حابار» تەلەارناسى تىكەلەي ەفيردەن (باستالۋى 21.00) كورسەتەدى. قازاقستاندىقتار ەرجان ءۇشىن داۋىستى قاراشانىڭ 22-سىنەن 23-ىنە قاراعان تۇنگى ساعات 01.00-دەن باستاپ Junior Eurovision سايتىندا بەرە الادى. ول ءۇشىن تىزىمنەن ەرجانمەن قاتار تاعى 2 قاتىسۋشىنى تاڭداپ, «داۋىستى قابىلداۋ»/ «داۋىس بەرۋ» تۇيمەشەگىن باسۋ قاجەت. داۋىس بەرۋ 24 قاراشا كۇنى ساعات 21.00-دە شوۋ باستالماي تۇرىپ ۋاقىتشا جابىلادى. ال ودان كەيىن قايتادان 15 مينۋتقا اشىلىپ, تاعى ءبىر مارتە داۋىس بەرۋ مۇمكىندىگى بولادى. جەرەبەگە سايكەس, قازاقستاندىق ورەن ساحناعا 10-ىنشى بولىپ شىعادى.
ايتا كەتەيىك, «Junior Eurovision» العاش رەت 2003 جىلى دانيانىڭ كوپەنگاگەن قالاسىندا ءوتتى. بيىلعى بايقاۋعا 19 ەلدەن ورەندەر قاتىسادى. ال قازاقستان بايراقتى باسەكەگە العاش رەت 2018 جىلى مينسكىدە (بەلارۋس) قاتىستى.
ەلىمىز اتىنان «وزىڭە سەن» انىمەن دانەليا تولەشوۆا ونەر كورسەتىپ, التىنشى ورىنعا يە بولدى. باس جۇلدە پولشالىق روكساننا ۆەنگەلگە بۇيىردى. ەكىنشى ورىندى فرانتسيا ءانشىسى انگەلينا, ءۇشىنشى ورىندى اۆستراليالىق دجاەل ۋەنا جەڭىپ الدى.
