«قابەكەڭدى كوردىم, اق ماتامەن جاپتى»: كولۋمبيادا سۋعا باتىپ كەتكەن قايىقتا قازاقستاندىقتىڭ قازا بولعانى تۋرالى اقپارات تارادى

فوتو: azattyq.org

كولۋمبيا جاعالاۋىندا سۋعا باتىپ كەتكەن قايىقتا قازاقستاندىق قازا بولعانى ايتىلدى. الايدا ەلىمىزدىڭ سىرتقى ىستەر مينيسترلىگى مۇنداي اقپارات جوق ەكەنىن ايتتى. بۇل تۋرالى Stan.kz اقپارات اگەنتتىگى ازاتتىق راديوسىنا سىلتەمە جاساپ حابارلايدى.

قايىقتا بولعان قابيدوللا قالي ەسىمدى قازاقستاندىق 9 شىلدەگە قاراعان ءتۇنى قايتىس بولدى. مالىمەتتى سول كۇنى قايىقتا بولعان تاعى ءبىر قازاقستاندىق بايحان جاپاق ايتىپ بەرگەن.

اقش-قا جەتۋدى جوسپارلاعان بەس قازاقستاندىق ء(ۇش ەرەسەك, ەكى بالا) وزگە ميگرانتتارمەن بىرگە كولۋمبيانىڭ سان-اندرەس ارالىنان نيكاراگۋانىڭ كورن ارالىنا قايىقپەن شىققان. سول كەزدە تولقىن كوتەرىلىپ, قايىق اۋدارىلعان. بايحان جاپاق پەن ونىڭ وتباسىن, ياعني ايەلى مەن ەكى بالاسىن جانە باسقا دا ميگرانتتاردى كولۋمبيانىڭ جاعالاۋ كۇزەتى قۇتقارىپ العان.

وسى ساپاردا بىرنەشە ادام وپات بولعان. سونىڭ ءبىرى قازاقستاندىق قابيدوللا قالي ەكەنى ايتىلدى. ونىڭ قازاسىن بايحان جاپاق كولۋمبيانىڭ كوشى-قون ورتالىعىنان ەستىگەن ەكەن.

«كوشى-قون ورتالىعىنا ول كىسىنىڭ سۇيەگىن الىپ كەتەيىن, بىرگە كەلدىك دەدىم. بۇلاي بولمايدى, تۋعان-تۋىسى, ساۋساق ءىزى يا ەلشىلىكتەن حات جىبەرۋ كەرەك دەدى. كەيىن قابەكەڭنىڭ تۋىستارىمەن بايلانىسقا شىقتىق», – دەدى بايحان جاپاق.

قۇتقارىلعاندار اراسىندا كولۋمبيا, ەكۆادور, يران, نيكاراگۋا, ۆەنەسۋەلا ازاماتتارى بولعان.

«يران ازاماتىن قۇتقارعاندا «قابەكەڭدى كوردىم, اق ماتامەن جاپتى» دەگەن. ەكەۋىن بىرگە تاپقان ەكەن. يران ازاماتىن 11 ساعاتتان كەيىن قۇتقارعان», – دەدى بايحان جاپاق.

بايحاننىڭ سوزىنشە, قابيدوللا قاليدىڭ اقش-تا تانىستارى بولعان. قاليدىڭ قازا بولعانى تۋرالى اقپارات 10 شىلدەدە تەلەگرام-ارنالاردا تارادى. 11 شىلدەدە ونىڭ تۇرسىن كەش ەسىمدى الىس تۋىسى قاليدىڭ قازاسى بولعانىن ەستىگەنىن ايتتى.

قىتاي قازاعىنىڭ تاعى ءبىر تۋىسى پىكىر بەرە المايتىنىن ايتىپ, جاعدايدى سىرتقى ىستەر مينيسترلىگى انىقتاپ جاتىر دەدى. ال سىرتقى ىستەر مينيسترلىگى وكىلى “بۇل جاعداي بويىنشا رەسمي اقپارات جوق» ەكەنىن حابارلادى. بايحان جاپاقتىڭ سوزىنشە, اقش-قا بارماق بولعان ولاردى الماتىدان برازيليانىڭ ريو-دە-جانەيرو قالاسىنا جەتكەندە نيكاراگۋا استاناسى ماناگۋاعا ۇشاققا وتكىزبەي قويعان. كەيىن كولۋمبيانىڭ سان-اندرەس ارالىنان قايىقپەن شىعۋعا بەل بايلاعان.

46 جاستاعى قابيدوللا قالي قازاقستانعا قىتايدان كوشىپ كەلگەن. الماتىدا اسپاز بولىپ جۇمىس ىستەگەن ەكەن. ول بايحان جاپاقپەن جەلىدەگى چاتتا تانىسىپ, 16 ماۋسىمدا قازاقستاننان بىرگە شىققان. جاپاقتىڭ سوزىنشە, قابيدوللا قاليدىڭ ايەلى, بالا-شاعاسى بولماعان, تۋىستارىنىڭ كوبى قىتايدا تۇرادى.

ايتا كەتەيىك, بۇعان دەيىن كولۋمبيادا ميگرانتتار مىنگەن قايىق سۋعا باتىپ كەتكەنى, ونىڭ ىشىندە قازاقستاندىقتار بار ەكەنى ايتىلعان ەدى.