«Qabekeńdi kórdim, aq matamen japty»: Kolýmbııada sýǵa batyp ketken qaıyqta qazaqstandyqtyń qaza bolǵany týraly aqparat tarady

Foto: azattyq.org

Kolýmbııa jaǵalaýynda sýǵa batyp ketken qaıyqta qazaqstandyq qaza bolǵany aıtyldy. Alaıda elimizdiń syrtqy ister mınıstrligi mundaı aqparat joq ekenin aıtty. Bul týraly Stan.kz aqparat agenttigi Azattyq radıosyna silteme jasap habarlaıdy.

Qaıyqta bolǵan Qabıdolla Qalı esimdi qazaqstandyq 9 shildege qaraǵan túni qaıtys boldy. Málimetti sol kúni qaıyqta bolǵan taǵy bir qazaqstandyq Baıhan Japaq aıtyp bergen.

AQSh-qa jetýdi josparlaǵan bes qazaqstandyq (úsh eresek, eki bala) ózge mıgranttarmen birge Kolýmbııanyń San-Andres aralynan Nıkaragýanyń Korn aralyna qaıyqpen shyqqan. Sol kezde tolqyn kóterilip, qaıyq aýdarylǵan. Baıhan Japaq pen onyń otbasyn, ıaǵnı áıeli men eki balasyn jáne basqa da mıgranttardy Kolýmbııanyń jaǵalaý kúzeti qutqaryp alǵan.

Osy saparda birneshe adam opat bolǵan. Sonyń biri qazaqstandyq Qabıdolla Qalı ekeni aıtyldy. Onyń qazasyn Baıhan Japaq Kolýmbııanyń kóshi-qon ortalyǵynan estigen eken.

«Kóshi-qon ortalyǵyna ol kisiniń súıegin alyp keteıin, birge keldik dedim. Bulaı bolmaıdy, týǵan-týysy, saýsaq izi ıa elshilikten hat jiberý kerek dedi. Keıin Qabekeńniń týystarymen baılanysqa shyqtyq», – dedi Baıhan Japaq.

Qutqarylǵandar arasynda Kolýmbııa, Ekvador, Iran, Nıkaragýa, Venesýela azamattary bolǵan.

«Iran azamatyn qutqarǵanda «Qabekeńdi kórdim, aq matamen japty» degen. Ekeýin birge tapqan eken. Iran azamatyn 11 saǵattan keıin qutqarǵan», – dedi Baıhan Japaq.

Baıhannyń sózinshe, Qabıdolla Qalıdiń AQSh-ta tanystary bolǵan. Qalıdiń qaza bolǵany týraly aqparat 10 shildede telegram-arnalarda tarady. 11 shildede onyń Tursyn Kesh esimdi alys týysy Qalıdiń qazasy bolǵanyn estigenin aıtty.

Qytaı qazaǵynyń taǵy bir týysy pikir bere almaıtynyn aıtyp, jaǵdaıdy syrtqy ister mınıstrligi anyqtap jatyr dedi. Al syrtqy ister mınıstrligi ókili “bul jaǵdaı boıynsha resmı aqparat joq» ekenin habarlady. Baıhan Japaqtyń sózinshe, AQSh-qa barmaq bolǵan olardy Almatydan Brazılııanyń Rıo-de-Janeıro qalasyna jetkende Nıkaragýa astanasy Managýaǵa ushaqqa ótkizbeı qoıǵan. Keıin Kolýmbııanyń San-Andres aralynan qaıyqpen shyǵýǵa bel baılaǵan.

46 jastaǵy Qabıdolla Qalı Qazaqstanǵa Qytaıdan kóship kelgen. Almatyda aspaz bolyp jumys istegen eken. Ol Baıhan Japaqpen jelidegi chatta tanysyp, 16 maýsymda Qazaqstannan birge shyqqan. Japaqtyń sózinshe, Qabıdolla Qalıdiń áıeli, bala-shaǵasy bolmaǵan, týystarynyń kóbi Qytaıda turady.

Aıta keteıik, buǵan deıin Kolýmbııada mıgranttar mingen qaıyq sýǵa batyp ketkeni, onyń ishinde qazaqstandyqtar bar ekeni aıtylǵan edi.