«قاعاز جۇزىندە ەمەس ءىس جۇزىندە شەشۋىڭىزدى سۇرايمىن»: دەپۋتات تىزىمدە جوق, ەسەپكە الىنباعان اۋىلداردىڭ ماسەلەسىن جەتكىزدى

فوتو: parlam.kz

گۇلدارا نۇرىموۆانىڭ سوزىنشە, مەملەكەتتىڭ قازىناسىنان بولىنگەن قارجى جەلگە ۇشىپ جاتىر, – دەپ حابارلايدى qandastar.kz turkystan.kz-كە سىلتەمە جاساپ.

ءماجىلىس دەپۋتاتى گۇلدارا نۇرىموۆا پرەمەر ءمينيستردىڭ ورىنباسارى رومان سكليارعا دەپۋتاتتىق ساۋال جولداپ, ايماقتارداعى سۋ تاپشىلىعى ماسەلەسىن كوتەردى.

تىزىمگە كىرمەگەن, ەسەپكە الىنباعان اۋىلدار بار پرەزيدەنت 2025 جىلعا دەيىن بارلىق ەلدى-مەكەندەردى اۋىز سۋمەن قامتاماسىز ەتۋ بويىنشا تاپسىرما بەرگەن. الايدا بۇگىنگى تاڭدا, ەل بويىنشا اۋىز سۋمەن قامتۋدىڭ ەڭ تومەن دەڭگەيى قوستاناي, سولتۇستىك قازاقستان, اباي, قاراعاندى جانە جامبىل وبلىستارىندا. سونىمەن قاتار, 121 اۋىل بويىنشا مەملەكەت باسشىسىنىڭ تاپسىرماسىنىڭ ورىندالماۋ قاۋپى بار, ونىڭ ىشىندە 51 اۋىل بويىنشا ءتىپتى جوبالىق سمەتالىق قۇجاتتار جوق. وسى تىزىمگە كىرمەگەن, ەسەپكە الىنباعان تاعى اۋىلدار بار. ولار – اقيقاتىن ايتساك, قاعاز جۇزىندە اۋىز سۋ بار, ال ءىس جۇزىندە جوق ەلدى مەكەندەر, – دەدى دەپۋتات.

گۇلدارا نۇرىموۆانىڭ سوزىنشە, مەملەكەتتىڭ قازىناسىنان بولىنگەن قارجى جەلگە ۇشىپ جاتىر.

مىسالى, جامبىل وبلىسىنداعى تۇرار رىسقۇلوۆ اۋدانىنا قاتىستى جارلىسۋ, مويىنقۇم اۋدانىنا قاتىستى قىلىشباي ەلدى مەكەندەرىندە اۋىز سۋ ماسەلەسى شەگىنە جەتىپ تۇر. قىلىشباي اۋىلىنداعى جاعداي فيلتر ورناتۋ ارقىلى جارىم-جارتىلاي شەشىلگەن بولسا, ال جارلىسۋ اۋىلىن اۋىز سۋمەن قامتۋ ءالى دە شەشىمىن تاپپاي وتىر. حالىقپەن كەزدەسكەن كەزدە, اۋىل تۇرعىندارى وسى سۇراقتى بىرنەشە مارتە كوتەردى, 5 جىل بويى شەشىمىن تاپپاي كەلە جاتقان ماسەلەگە نارازىلىق ءبىلدىردى. 2020 جىلى سۋ قۇرىلىستارىن جۇرگىزگەن جاۋاپتى مەردىگەر كومپانيا ءوز جۇمىستارىن تولىق اتقارماعان,ناتيجەسىندە اۋىز سۋ جوق. ال, 2021 جىلدىڭ ساۋىرىندە جەرگىلىكتى باسىلىمدا شىققان ماقالادا اۋىز سۋدىڭ حالىققا جەتكەنى جانە سۋمەن قامتاماسىز ەتۋ جۇمىستارىنىڭ ءساتتى وتكەنى تۋرالى حابارلانعان. سۇمدىق جاعداي. بۇل – ناعىز كوزبوياۋشىلىق, جاۋاپسىزدىق, – دەدى دەپۋتات.

اۋىل تۇرعىندارى كوپتەگەن كەمشىلىكتەردى انىقتاپ ءتيىستى ورگاندارعا جەتكىزگەن. بىراق ناتيجە جوك.

سوندا رەسپۋبليكالىق بيۋدجەتتەن بولىنگەن 414 ملن., وبلىستىق بيۋدجەتتەن بولىنگەن 80 ملن., سونىمەن كاتار جوبالىق سمەتالىق  قۇجاتتارعا,  ەكسپەرتيزاعا, گەولوگيالىق جۇمىستارعا بولىنگەن قارجىنىڭ ىزدەۋ-سۇراۋى جوق پا? مۇنداي مىسالدار وڭىرلەردە جەتەرلىك. وسىعان وراي, سىزدەن اتالعان جاعدايدى جەكە باقىلاۋىڭىزعا الىپ, ءتيىستى تەكسەرىستى وتكىزىپ, وسىعان جول بەرگەندەردى جاۋاپقا تارتىپ, تاعى وسىنداي جاعدايداعى اۋىلداردى انىقتاپ,جوبالىق سمەتالىق قۇجات جوق 51 اۋىل بويىنشا جۇمىستاردى تەز ارادا اتقارىپ, اۋىلداردى اۋىز سۋمەن قامتاماسىز ەتۋدى قاعاز جۇزىندە ەمەس ءىس جۇزىندە شەشۋىڭىزدى سۇرايمىن, – دەدى گۇلدارا نۇرىموۆا.