Jańalyqtar
«Qaǵaz júzinde emes is júzinde sheshýińizdi suraımyn»: depýtat tizimde joq, esepke alynbaǵan aýyldardyń máselesin jetkizdi
Foto: parlam.kz
Gúldara Nurymovanyń sózinshe, memlekettiń qazynasynan bólingen qarjy jelge ushyp jatyr, – dep habarlaıdy qandastar.kz turkystan.kz-ke silteme jasap.
Májilis depýtaty Gúldara Nurymova Premer mınıstrdiń orynbasary Roman Sklıarǵa depýtattyq saýal joldap, aımaqtardaǵy sý tapshylyǵy máselesin kóterdi.
Tizimge kirmegen, esepke alynbaǵan aýyldar bar Prezıdent 2025 jylǵa deıin barlyq eldi-mekenderdi aýyz sýmen qamtamasyz etý boıynsha tapsyrma bergen. Alaıda búgingi tańda, el boıynsha aýyz sýmen qamtýdyń eń tómen deńgeıi Qostanaı, Soltústik Qazaqstan, Abaı, Qaraǵandy jáne Jambyl oblystarynda. Sonymen qatar, 121 aýyl boıynsha Memleket basshysynyń tapsyrmasynyń oryndalmaý qaýpi bar, onyń ishinde 51 aýyl boıynsha tipti jobalyq smetalyq qujattar joq. Osy tizimge kirmegen, esepke alynbaǵan taǵy aýyldar bar. Olar – aqıqatyn aıtsak, qaǵaz júzinde aýyz sý bar, al is júzinde joq eldi mekender, – dedi depýtat.
Gúldara Nurymovanyń sózinshe, memlekettiń qazynasynan bólingen qarjy jelge ushyp jatyr.
Mysaly, Jambyl oblysyndaǵy Turar Rysqulov aýdanyna qatysty Jarlysý, Moıynqum aýdanyna qatysty Qylyshbaı eldi mekenderinde aýyz sý máselesi shegine jetip tur. Qylyshbaı aýylyndaǵy jaǵdaı fıltr ornatý arqyly jarym-jartylaı sheshilgen bolsa, Al Jarlysý aýylyn aýyz sýmen qamtý áli de sheshimin tappaı otyr. Halyqpen kezdesken kezde, aýyl turǵyndary osy suraqty birneshe márte kóterdi, 5 jyl boıy sheshimin tappaı kele jatqan máselege narazylyq bildirdi. 2020 jyly sý qurylystaryn júrgizgen jaýapty merdiger kompanııa óz jumystaryn tolyq atqarmaǵan,nátıjesinde aýyz sý joq. Al, 2021 jyldyń sáýirinde jergilikti basylymda shyqqan maqalada aýyz sýdyń halyqqa jetkeni jáne sýmen qamtamasyz etý jumystarynyń sátti ótkeni týraly habarlanǵan. Sumdyq jaǵdaı. Bul – naǵyz kózboıaýshylyq, jaýapsyzdyq, – dedi depýtat.
Aýyl turǵyndary kóptegen kemshilikterdi anyqtap tıisti organdarǵa jetkizgen. Biraq nátıje jok.
Sonda respýblıkalyq bıýdjetten bólingen 414 mln., oblystyq bıýdjetten bólingen 80 mln., sonymen katar jobalyq smetalyq qujattarǵa, ekspertızaǵa, geologııalyq jumystarǵa bólingen qarjynyń izdeý-suraýy joq pa? Mundaı mysaldar óńirlerde jeterlik. Osyǵan oraı, Sizden atalǵan jaǵdaıdy jeke baqylaýyńyzǵa alyp, tıisti tekseristi ótkizip, osyǵan jol bergenderdi jaýapqa tartyp, taǵy osyndaı jaǵdaıdaǵy aýyldardy anyqtap,jobalyq smetalyq qujat joq 51 aýyl boıynsha jumystardy tez arada atqaryp, aýyldardy aýyz sýmen qamtamasyz etýdi qaǵaz júzinde emes is júzinde sheshýińizdi suraımyn, – dedi Gúldara Nurymova.
