قايرات بورانباەۆ قايدا ءجۇر?

قازاقستاندىق كاسىپكەر قايرات بورانباەۆ الەۋمەتتىك جەلىلەردەگى قولدانۋشىلار مەن جۋرناليستەردەن ءوزىنىڭ قازىر نەمەن اينالىساتىنىنا بايلانىستى سۇراق ءجيى قويىلاتىنىن ايتتى.

مەن كىممىن?

ء«اردايىم “كاسىپكەرمىن” دەپ قىسقا قايىرعىم كەلەدى. بىراق مەن كاسىپكەرلەردىڭ ءارتۇرلى بولاتىنىن, ال مەنىڭ قازىرگى قىزمەتىم كوپتەگەن سالانى قامتيتىنىن تۇسىنەمىن, سوندىقتان ءبىر انىقتاما ويلاپ تابۋ وڭاي ەمەس. ماعان بيزنەس قۇرالدار ارقىلى وزگەرىستەر جاساعان ۇنايدى. بۇل – نارىقتىڭ بارلىق مۇمكىندىكتەرىن پايدالانا وتىرىپ, تەك تابىس تابۋ عانا ەمەس, سونىمەن قاتار قورشاعان الەمدى جاقسى جاققا وزگەرتۋ مۇمكىندىگى. بۇل تەحنولوگيالار, كادرلاردى دايارلاۋ جانە ساپالى ءارى سۇرانىسقا يە ءونىم جاساۋ ارقىلى جۇزەگە اسادى», – دەدى بورانباەۆ.

پايدا تابۋدى عانا كوزدەمەيدى

ول قازىرگى ۋاقىتتا “المالى” حولدينگىنە بىرىككەن كومپانيالار توبىن باسقاراتىنىن جانە بۇل قىزمەتتە تازا پايدانى كوزدەمەيتىنىن اتاپ ءوتتى.

«مەنىڭ مىندەتىم – ولاردىڭ ارقايسىسىنىڭ ءوز سالاسىندا كوشباسشى بولۋىن جانە ەلدىڭ دامۋىنا تىكەلەي اسەر ەتۋىن قامتاماسىز ەتۋ: ينفراقۇرىلىم قۇرۋ, كادرلار دايارلاۋ, ەكونوميكانىڭ باسەكەگە قابىلەتتىلىگىن ارتتىرۋ ءۇشىن باتىستىق ستاندارتتار مەن تەحنولوگيالاردى ەنگىزۋ. ءبىز كەرەمەت ۋاقىتتا ءومىر ءسۇرىپ جاتىرمىز. كەشە عانا مۇحيتتىڭ ار جاعىندا جاسالعان بىرەگەي تەحنولوگيا ەرتەڭ-اق مۇندا, قازاقستاندا جۇزەگە اسىرىلۋى مۇمكىن. بۇل بىزگە ۇلكەن مۇمكىندىكتەر تۋعىزادى», – دەدى ول.

ونىڭ كومپانيالارى نەمەن اينالىسادى

بورانباەۆتىڭ ايتۋىنشا, بۇگىنگى تاڭدا كومپانيالار ادامداردى تاماقتاندىرادى, ءدارى-دارمەكپەن, زاماناۋي مەديتسينالىق جابدىقتارمەن, ەنەرگيامەن قامتاماسىز ەتەدى, تاۋارلار مەن قىزمەتتەر ۇسىنادى.

«جاقسى جاعدايلارى مەن تولىق الەۋمەتتىك پاكەتى بار 12 مىڭ جۇمىس ورنىن قۇرادى. ءبىزدىڭ حولدينگ زياتكەرلىك جانە تەحنولوگيالىق الەۋەت ەسەبىنەن قوسىمشا قۇن جاساي وتىرىپ, شيكىزات سالاسىنان تىس ءىرى سالىق تولەۋشى. نەگىزگى قىزمەتتەن باسقا, سپورت, مادەنيەت, ءبىلىم بەرۋ, بالالاردى قولداۋ جانە ەكولوگيا سالاسىنداعى الەۋمەتتىك جوبالارمەن اينالىساتىن Almaly social باعىتى بار. مەن قازاقستاننىڭ بارلىق تۇكپىرىندە بولدىم جانە ءار ءتۇرلى سالالارداعى ادامدارمەن تانىسپىن. ءبىزدىڭ ەلدىڭ ۇلكەن ەكونوميكالىق جانە ادامي الەۋەتى بار, ونى مەن رەسۋرستارى مەن مۇمكىندىكتەرى بار كاسىپكەر رەتىندە اشىپ, بارلىعىنا پايدالى ەتىپ قولدانعىم كەلەدى», – دەپ اتاپ ءوتتى بورانباەۆ.

ەسكە سالا كەتەيىك, بۇعان دەيىن قايرات بورانباەۆ ۇلتتىق پاراليمپيادالىق كوميتەتىنىڭ پرەزيدەنتى بولىپ سايلانعانى حابارلانعان بولاتىن. سونىمەن قاتار, قايرات بورانباەۆ استانادا پاراليمپياداشىلار مەن مۇمكىندىگى شەكتەۋلى ادامدار ءۇشىن جازعى سپورت تۇرلەرى بويىنشا جاڭا جاتتىعۋ ورتالىعى سالىناتىنىن حابارلاعان.