Qaırat Boranbaev qaıda júr?

Qazaqstandyq kásipker Qaırat Boranbaev áleýmettik jelilerdegi qoldanýshylar men jýrnalısterden óziniń qazir nemen aınalysatynyna baılanysty suraq jıi qoıylatynyn aıtty.

Men kimmin?

«Árdaıym “Kásipkermin” dep qysqa qaıyrǵym keledi. Biraq men kásipkerlerdiń ártúrli bolatynyn, al meniń qazirgi qyzmetim kóptegen salany qamtıtynyn túsinemin, sondyqtan bir anyqtama oılap tabý ońaı emes. Maǵan bıznes quraldar arqyly ózgerister jasaǵan unaıdy. Bul – naryqtyń barlyq múmkindikterin paıdalana otyryp, tek tabys tabý ǵana emes, sonymen qatar qorshaǵan álemdi jaqsy jaqqa ózgertý múmkindigi. Bul tehnologııalar, kadrlardy daıarlaý jáne sapaly ári suranysqa ıe ónim jasaý arqyly júzege asady», – dedi Boranbaev.

Paıda tabýdy ǵana kózdemeıdi

Ol qazirgi ýaqytta “Almaly” holdıngine birikken kompanııalar tobyn basqaratynyn jáne bul qyzmette taza paıdany kózdemeıtinin atap ótti.

«Meniń mindetim – olardyń árqaısysynyń óz salasynda kóshbasshy bolýyn jáne eldiń damýyna tikeleı áser etýin qamtamasyz etý: ınfraqurylym qurý, kadrlar daıarlaý, ekonomıkanyń básekege qabilettiligin arttyrý úshin batystyq standarttar men tehnologııalardy engizý. Biz keremet ýaqytta ómir súrip jatyrmyz. Keshe ǵana muhıttyń ar jaǵynda jasalǵan biregeı tehnologııa erteń-aq munda, Qazaqstanda júzege asyrylýy múmkin. Bul bizge úlken múmkindikter týǵyzady», – dedi ol.

Onyń kompanııalary nemen aınalysady

Boranbaevtyń aıtýynsha, búgingi tańda kompanııalar adamdardy tamaqtandyrady, dári-dármekpen, zamanaýı medıınalyq jabdyqtarmen, energııamen qamtamasyz etedi, taýarlar men qyzmetter usynady.

«Jaqsy jaǵdaılary men tolyq áleýmettik paketi bar 12 myń jumys ornyn qurady. Bizdiń holdıng zııatkerlik jáne tehnologııalyq áleýet esebinen qosymsha qun jasaı otyryp, shıkizat salasynan tys iri salyq tóleýshi. Negizgi qyzmetten basqa, sport, mádenıet, bilim berý, balalardy qoldaý jáne ekologııa salasyndaǵy áleýmettik jobalarmen aınalysatyn Almaly social baǵyty bar. Men Qazaqstannyń barlyq túkpirinde boldym jáne ár túrli salalardaǵy adamdarmen tanyspyn. Bizdiń eldiń úlken ekonomıkalyq jáne adamı áleýeti bar, ony men resýrstary men múmkindikteri bar kásipker retinde ashyp, barlyǵyna paıdaly etip qoldanǵym keledi», – dep atap ótti Boranbaev.

Eske sala keteıik, buǵan deıin Qaırat Boranbaev Ulttyq paralımpıadalyq komıtetiniń prezıdenti bolyp saılanǵany habarlanǵan bolatyn. Sonymen qatar, Qaırat Boranbaev Astanada paralımpıadashylar men múmkindigi shekteýli adamdar úshin jazǵy sport túrleri boıynsha jańa jattyǵý ortalyǵy salynatynyn habarlaǵan.