قايرات بورانباەۆتىڭ ءىنىسى مۇرات بورانباەۆ اسا ءىرى كولەمدە اقشا جىمقىردى دەگەن كۇدىكپەن ۇستالدى

2022 جىلى قارجى مونيتورينگى اگەنتتىگى كاسىپكەر مۇرات بورانباەۆتى ىزدەۋگە جاريالادى. ول الماتىداعى اقىلى اۆتوتۇراق بويىنشا قوزعالعان قىلمىستىق ىستە ايىپتالۋشى دەپ تانىلدى. ياعني اسا ءىرى كولەمدە مەملەكەت قارجىسىن جىمقىردى دەگەن كۇدىككە ءىلىندى. مەملەكەتتىك ساتىپ الۋ سايتىندا مۇرات بورانباەۆتىڭ 2017 جىلى «الان پاركينگ» جشس باسشىسى بولىپ تىركەلگەنى تۋرالى اقپارات جاريالانعان.

2022 جىلدىڭ ساۋىرىندە وسى كومپانيانىڭ ديرەكتورى مۇحتار بازارباەۆتىڭ قاماۋعا الىنعانى جاريالانىپ, كوپ ۇزاماي «الماتى سپەتستەحپاركينگ سەرۆيس» جشس ديرەكتورى مارات پىرىنبەكوۆ قاماۋعا الىندى.

وتكەن جىلدىڭ جەلتوقسان ايىندا قايرات بورانباەۆقا تيەسىلى RR2 كومپانياسى Alan Parking اكتسيالارىنىڭ 30%-ىن ساتىپ الدى. بۇعان دەيىن اقىلى اۆتوتۇراقتاردىڭ وپەراتورى مەملەكەتكە تيەسىلى بولعان.

كەيىن الماتى اكىمدىگى «الماتى سپەتستەحپاركينگ سەرۆيس» سەرىكتەستىگىنىڭ 70% اكتسياسى مەن «الان پاركينگ» كومپانياسىنىڭ 100% قالا مەنشىگىنە قايتارىلعانىن حابارلادى.

وتكەن جىلدىڭ كۇزىندە مۇرات بورانباەۆ حالىقارالىق ىزدەۋدە بولعان. ول كەزدە اگەنتتىكتىڭ ەكونوميكالىق تەرگەۋ قىزمەتى اسا ءىرى كولەمدە مەملەكەت قارجىسىن ۇرلاۋ فاكتىسى بويىنشا سوتقا دەيىنگى تەرگەۋ جۇرگىزىپ جاتقانىن حابارلادى.

«قارجى مونيتورينگى اگەنتتىگى مۇرات بورانباەۆتىڭ ۇستالۋىنا بايلانىستى 2024 جىلدىڭ 24 جەلتوقسانىندا ىزدەستىرۋ جۇمىستارى توقتاتىلعانىن حابارلايدى», – دەلىنگەن حابارلامادا.

ەسكە سالايىق, بۇعان دەيىن قايرات بورانباەۆتىڭ «قازترانسگاز» اق-نىڭ اقشاسىن جىمقىرعانى ءۇشىن 6 جىلعا سوتتالعانى تۋرالى جازعان ەدىك. كەيىن مەملەكەت مەنشىگىنە ساۋدا ويىن-ساۋىق كەشەنىن, جىلجىمايتىن م ۇلىكتى باسقارۋ كومپانياسىن جانە فيتنەس كلۋبتار جەلىسىن قايتاردى. زالالدى وتەۋىنە بايلانىستى سوت ونىڭ ءوتىنىشىن قاناعاتتاندىرىپ, بورانباەۆ تۇرمەدەن بوساتىلىپ, پروباتسيالىق باقىلاۋعا الىندى.