Qaırat Nurtas bostandyqqa shyqty

Foto: Stan.kz

Ushaqta tóbeles shyǵarǵany úshin 15 táýlikke qamalǵan ánshi Qaırat Nurtas 20 shildege qaraǵan túni bostandyqqa shyqty. Bul týraly Stan.kz aqparat agenttigi habarlaıdy.

Ony ata-anasy Gúlzıra Aıdarbekova men Nurtas Aıdarbekov kútip aldy. Olar uly úshin arnaıy Almatydan kelgen. Jelide taraǵan vıdeodan Aıdarbekovterdiń tuńǵyshyn qatty qushaqtap, kóz jasyna erik bergenin kórýge bolady.

Ánshi jaqyndaryn kórgen soń, birden kóligine otyryp ketip qalǵan. Degenmen ol óziniń jaǵdaıyna qatysty pikir bildirip úlgerdi.

«Densaýlyǵym bári jaqsy shúkir. Raqmet», – dep qysqa qaıyrdy óner ıesi. .

Anasy Gúlzıra Aıdarbekova da qýanyshyn jasyrmady.

«Qýanyshtymyn. Eshbir anany balamen synamasyn. Bárin Allaǵa tapsyraıyq. Bári jaqsy bolsyn», – dedi prodıýser.

Eske salaıyq, 5 shildede Qaırat Nurtas 15 táýlikke qamaýǵa alynǵan bolatyn.

Qaırat Nurtasqa ákimshilik quqyq buzýshylyq týraly kodekstiń 434-babynyń 2-bóligi (jyl ishinde qaıtalap jasalǵan usaq buzaqylyq) jáne ákimshilik quqyq buzýshylyq týraly kodekstiń 73-babynyń 1-1-bóligi (densaýlyqqa qasaqana jeńil zııan keltirý) boıynsha aıyp taǵyldy.