قايرات نۇرتاس: «مەن جابىرلەنۋشىمىن!»

استانادا قايرات نۇرتاسقا قاتىستى باپتار بويىنشا سوت پروتسەسى باستالدى. ءانشىنىڭ ءوزى سوتقا ونلاين قاتىسىپ, ءوزىن جابىرلەنۋشىمىن دەپ جاريالادى, دەپ حابارلايدى qandastar.kz. Stan.kz سىلتەمە جاساپ.

سوتتا اكىمشىلىك قۇقىق بۇزۋشىلىق كودەكسى 434-بابىنىڭ 2-بولىگى («ۇساق بۇزاقىلىق ءبىر جىل ىشىندە قايتالاپ جاسالعان») بويىنشا ءىس قارالدى.

سوت بارىسىندا قايرات نۇرتاستىڭ رەسمي وكىلى بولىپ ءىنىسى ايان نۇرتاس پەن اناسى گۇلزيرا ايداربەكوۆا قاتىستى.

«مەن ۇرعان جوقپىن, اۋەلى مەنى سوققىعا جىقتى» دەگەن قايرات نۇرتاس قارسى ارىزدى ءوزى بەرمەكشى ەكەنىن ايتىپ, جانجالدىڭ نەدەن باستالعانىن ەسكە الدى.

«ول ەكەۋمىز دوس بولعانبىز. ءتورتىنشى شىلدەدە تويعا شاقىردى. مەن بارۋدان باس تارتىپ, بالاعات سوزدەر ايتتىم. ال ول بارماساڭ, اياعىما جىعىل دەدى. سوسىن مەنى باسىمنان الىپ, ءبىرىنشى بولىپ ۇردى. سوسىن مەن دە ۇردىم. بىراق ءتارتىپتى بۇزعان جوقپىن. بۇل جەردە مەن جابىرلەنۋشىمىن. ول ءبىرىنشى باستادى. مەنى ۇرعاننان كەيىن عانا ۇردىم. جاراقاتتى ءبارىمىز الدىق, ەڭ باستىسى تىنىش وتىردىق قوي. ۇشاقتا كەزدەسىپ قالعان كەزدە, مەنى ءبىرىنشى ۇردى. مەندە قاراپ تۇرماي, ونى دا ءبىر-ەكى رەت ۇردىم. بۇل جونىندەگى كىنامدى تولىعىمەن مويىندايمىن», – دەدى قايرات نۇرتاس.

گۇلزيرا ايداربەكوۆانىڭ ايتۋىنشا, اسلان ەسىمدى ەر اداممەن بالاسى ەكەۋى بۇرىننان جاقىن تانىس ءارى دوس ەكەنىن مالىمدەدى. اناسى بالاسىنا سوت تاراپىنان سۇراقتار قويماۋىن تالاپ ەتتى. ال اسلان ەسىمدى جابىرلەنۋشى ءوز تاراپىنان بىلاي دەيدى:

«مەنى جەردەن الىپ, جەرگە سالىپ بوقتاعان سوزدەرى دە بار. تاڭەرتەڭ تۇرىپ ورتاق دوستارىمىزعا حابارلاسىپ, ول نەگە مەنى بوقتادى, رەنجۋلى مە دەپ سۇرادىم. 4 ءساۋىر كۇنى جولعا شىقتىم, سول كەزدە ۇشاقتا قايراتتى كوردىم. سوسىن نەگە بوقتادىڭ دەپ سۇرادىم. مەنى بورتسەرىك الىپ كەتتى. سول كەزدە مەنى قايرات ۇردى. سوسىن ەكەۋمىز ۇشاق ىشىندە ەكى جاققا وتىردىق. ۇشاقتان تۇسكەن سوڭ پوليتسيا ەكەۋمىزدى الىپ كەتتى», – دەدى جابىرلەنۋشى. 

اسلاننىڭ ايتۋىنشا, بورتسەرىك قايراتتى ەمەس, ونى جىبەرمەي ۇستاپ وتىرعان.

“بورتسەرىك مەنى عانا بايلاپ ۇستادى. قايراتتى حالىقتىڭ بالاسى بولعان سوڭ قولدادى ما, بىلمەدىم? مەنىڭ تاراپىمنان بۇزاقىلىق بولدى دەپ ەسەپتەمەيمىن. قايرات تاراپىنان ءتارتىپ بۇزۋشىلىق بولدى دەپ ەسەپتەيمىن. ءانشى ماعان نەشە ءتۇرلى بالاعات ءسوز ايتتى. ايداربەكوۆكە ارىز-شاعىمىم جوق. اكىمشىلىك ءىستى قىسقارتۋدى سۇرايمىن», – دەدى جابىرلەنۋشى. 

گۇلزيرا ايداربەكوۆا جانجالعا ۇلى دا, جابىرلەنۋشى دە كىنالى دەپ سانايدى. ول ۇلىنا قاماۋعا الۋدىڭ ورنىنا اكىمشىلىك ايىپپۇل سالۋدى سۇرايدى. ءانشىنىڭ گاسترولدىك ساپارلارى بار دەپ العا تارتادى.

پروكۋرور ءانشى قايرات نۇرتاستى 15 تاۋلىككە قاماۋدى سۇرادى.