قايرات نۇرتاس پەن تۇرسىنبەك قاباتوۆ اۋەكومپانيالاردىڭ قارا تىزىمىنە ەندى مە?

ۆيدەو كادرى

وتكەن كۇندەرى بەلگىلى ارتىستەر قايرات نۇرتاس پەن تۇرسىنبەك قاباتوۆتىڭ ۇشاق بورتىنداعى مىنەز-قۇلقىنا قاتىستى وقيعالار قازنەتتە قىزۋ تالقىلاندى. وسىعان بايلانىستى ولار اۋەكومپانيالاردىڭ قارا تىزىمىنە ەندى مە دەگەن سۇراق تۋىندايدى. Tengritravel.kz جاعدايدى زەرتتەپ كوردى.

Air Astana اۋەكومپانياسى جولاۋشىلاردىڭ دەربەس دەرەكتەرىن بەرۋگە قۇقىعى جوق ەكەنى تۋرالى ايتىپ, قازاقستاندىق شوۋ-بيزنەستىڭ بەلگىلى وكىلدەرى قارا تىزىمگە ەنگىزىلدى مە, جوق پا بولىسپەدى.

بۇعان دەيىن بيىلعى ساۋىردە اۋە كولىگىمەن تاسىمالداۋعا شەكتەۋ قويىلعان تۇلعالاردىڭ تىزىلىمىنە قانشا ادام ەنگىزىلگەنىن ناقتىلاعان بولاتىنبىز. ماتەريال جاريالانعان كەزدە بۇل تىزىمگە 4 ادام ەنگىزىلگەنى بەلىگىلى بولدى. اۋەكومپانياسى قازىرگى ۋاقىتتا قارا تىزىمدەگى جولاۋشىلار سانىندا ەشقانداي وزگەرىس بولماعانىن ايتتى. سايكەسىنشە, ساۋىردەن بەرى جاعداي وزگەرگەن جوق جانە ارتىستەر اۋە قاتىناسى شەكتەلگەن تۇلعالاردىڭ تىزىلىمىنە ەنگىزىلمەگەن دەپ بولجاۋعا بولادى.

«78-1, 8-باپتىڭ 8-تارماعىنا سايكەس اۋەكومپانيا اۋە تاسىمالى شەكتەلگەن تۇلعالار تىزىلىمىنە ەنگىزىلگەن جولاۋشىنىڭ (جەكە تۇلعانىڭ) دەربەس دەرەكتەرىن ءۇشىنشى تۇلعالارعا بەرۋگە قۇقىلى ەمەس جانە «دەربەس دەرەكتەر جانە ولاردى قورعاۋ تۋرالى» قازاقستان رەسپۋبليكاسىنىڭ زاڭىنا سايكەس وسى تۇلعالاردىڭ قۇپيالىلىعىن قامتاماسىز ەتەدى. بۇگىندە تىركەۋدە 4 ادام بار», – دەپ حابارلادى اۋەكومپانياسىنىڭ ءباسپاسوز قىزمەتى.

ءبىز بۇل اقپاراتتى باسقا اۋەكومپانيا وكىلدەرىنەن دە سۇرادىق. Qazaq Air ازىرگە بىردە-ءبىر جولاۋشى قارا تىزىمگە ەنگىزىلمەگەنىن ايتتى. Scat-تا دا وسىنداي جاعداي.

ايتا كەتۋ كەرەك, قارا تىزىمگە ەنگىزۋ شارالارى بورتتاعى بارلىق جولاۋشىنىڭ قاۋىپسىزدىگى مەن جايلىلىعىن قامتاماسىز ەتۋگە باعىتتالعان. كومپانيا وكىلدەرى جولاۋشىلاردىڭ قاۋىپسىزدىگى مەن ءال-اۋقاتى ولار ءۇشىن ءبىرىنشى كەزەكتەگى مىندەت ەكەنىن جانە ولاردى قامتاماسىز ەتۋ ءۇشىن قاجەتتى شارالاردى قابىلداۋدى جالعاستىراتىنىن اتاپ ءوتتى.

قارا تىزىمدە قاۋىپسىزدىك ەرەجەلەرىن بۇزىپ, باسقا جولاۋشىلارعا قاۋىپ توندىرەتىن جولاۋشىلاردىڭ ەسىمدەرى جازىلاتىنىن ايتا كەتەيىك. بۇل كريتەريدى بۇكىل الەم بويىنشا اۋەكومپانيالار پايدالانادى.