قايرات نۇرتاس ۇشاقتاعى توبەلەستىڭ كەسىرىنەن قانشا قارجىسىنان ايىرىلدى

فوتو: اشىق دەرەككوز

تانىمال ءانشىنىڭ شىعىنى قانشا بولدى دەگەن ساۋالعا پروديۋسەر التىنبەك راحمەتوۆ جاۋاپ بەردى, دەپ حابارلايدى Ozgeris.info.

Inform جازعانداي, پروديۋسەر قاماۋعا الىنعان ونەر ادامدارىن حالىق ءبىرجولا جەك كورىپ كەتپەيتىنىن ايتتى.

“تۇرسىنبەك قاماۋدان شىققان بويدا ۇلكەن كونتسەرت بەردى. كونتسەرتتەردە قاماۋعا الىنعانى تۋرالى ازىلدەپ, كورەرمەندەردىڭ قوشەمەتىنە بولەندى. بوستاندىققا شىققان سوڭ قايرات نۇرتاس پەن ءابدىجاپپار القوجا دا كونتسەرت بەرسە, زال لىق تولى بولاتىنىنا سەنىمدىمىن. ۇساق قۇقىقبۇزۋشىلىقتارى ءۇشىن حالىق ولاردى جەك كورىپ كەتپەيدى”, – دەيدى بەلگىلى پروديۋسەر التىنبەك راحمەتوۆ.
الايدا, قايرات نۇرتاس 19 شىلدەدە اقسۋ قالاسى مەن مەتاللۋرگتەر كۇنىنە ارنالعان كونتسەرتتە ونەر كورسەتۋى كەرەك ەدى.

“كونتسەرتتىڭ ۇيىمداستىرۋشىسى بولعاندىقتان, قايرات نۇرتاس بۇل شاراعا شىققانى ءۇشىن بەرىلەتىن 5 ميلليون تەڭگەدەن قاعىلدى دەپ ايتا الامىن. ونىڭ باسقا كونتسەرتتەرىنەن حابارىم جوق. كەي انشىلەر توي-تومالاققا اپتاسىنا ءبىر رەت بارادى. كەيبىرى دەرلىك ءار قالادا وتەتىن تويلارعا قاتىسادى», – دەيدى راحمەتوۆ.
توي ۇيىمداستىرۋشىلاردىڭ ايتۋىنشا, قايرات نۇرتاستىڭ گونورارى كەم دەگەندە 2,5 ميلليون تەڭگە. تۇرسىنبەك قاباتوۆ تويدا توستمەيستەر بولىپ 10-15 مىڭ دوللار تابادى.

ءابدىجاپپار القوجا بۇعان دەيىنگى سۇحباتىندا قالاماقى كولەمىن ايتۋدان باس تارتقان ەدى.

“مەنىڭ قالاماقىم بىرەۋلەر ءۇشىن از عانا بولسا, بىرەۋلەر ءۇشىن ءبىر جىلدىق جالاقى. تولەم سوماسىن ايتپاي-اق قويايىن. ويتكەنى قوعامدا ادامداردىڭ تابىس دەڭگەيى ءارتۇرلى. الىم سوماسىن ايتسام, ول بىرەۋگە كوپ نەمەسە كەرىسىنشە تىم از بولىپ كورىنۋى مۇمكىن. سوندىقتان بۇل قۇپيا بولىپ قالسىن», – دەدى ءانشى.

ايتا كەتەيىك, بۇعان دەيىن تۇرسىنبەك قاباتوۆ ۇشاقتا جانجال شىعارعانى ءۇشىن 5 تاۋلىككە قاماۋعا الىنعان ەدى. ازىلكەشتىڭ ءىزىن الا قايرات نۇرتاس ۇشاقتا توبەلەسىپ 15 تاۋلىككە قامالعان. كەيىننەن ءانشى ءابدىجاپپار القوجا پوليتسيا قىزمەتكەرلەرىنە باعىنباعانى ءۇشىن قوناەۆتا ۇستالىپ, 10 تاۋلىككە قامالعان ەدى.