«قايرات پەن قاناتتان عاسىر كونتسەرتى». ازىلكەشتەر قازاقستاننىڭ 48 قالاسىندا كونتسەرت بەرەدى

فوتو: ۆيدەودان سكرينشوت

تۇرسىنبەك قاباتوۆتىڭ «ءازىل الەمى» ارقىلى حالىققا تانىلعان ازىلكەشتەر قايرات ادىلگەرەي مەن قانات ءالجاپپاروۆ قازاقستاننىڭ 48 قالاسىندا كونتسەرت بەرەدى, دەپ حابارلايدى Massaget.kz ءتىلشىسى.

30 قىركۇيەكتە ءۇرجاردان باستاۋ العان كونتسەرت 30 جەلتوقسان كۇنى استانا قالاسىندا اياقتالادى. ءۇش ايعا سوزىلاتىن ساپارعا ونەر يەلەرى قىزۋ دايىندالىپتى. ەكەۋىنىڭ ەسەپ بەرۋ كونتسەرتى 40 جاسقا تولۋىنا بايلانىستى ۇيىمداستىرىلىپتى.

«كوكتەمنەن بەرى دايىندالىپ ءجۇرمىز. 5-6 ايداي تىڭعىلىقتى دايىندالدىق. سوڭعى ەكى اي ءتىپتى تەك كونتسەرتتىڭ شارۋاسىمەن وتىردىق», – دەدى قانات ءالجاپپاروۆ Revue news باعدارلاماسىنا بەرگەن سۇحباتىندا.

جوبا اۆتورلارىنىڭ ايتۋىنشا, جوبانىڭ نەگىزگى كونتسەپتسياسى – 40-تا قامال الۋ.

«قايرات ەكەۋمىز بيىل 40 جاسقا تولىپ جاتىرمىز عوي. وسى جاسىمىزدى حالىقپەن بىرگە تويلايىق دەگەن ويدان تۋىنداعان جوسپار», – دەدى قانات ءالجاپپاروۆ.

ال قايرات ادىلگەرەي بۇل كونتسەرتكە «عاسىر كونتسەرتى» دەگەن اتاۋ بەرىپتى.

«حالىق بىزدەن كوپ نارسە كۇتىپ جاتىر ەكەن. وزىمىزشە «عاسىر كونتسەرتى» دەپ جاتىرمىز. عاسىردا بولماعان كونتسەرت دەپ ايتىپ الدىق تا, ەندى سوعان لايىق بولۋ ءۇشىن دايىندالىپ جاتىرمىز. جاۋاپكەرشىلىك ەكەۋمىزگە دە اۋىر بولىپ تۇر, بىزگە قاتەلەسۋگە بولمايدى», – دەيدى ول.

ونەر يەلەرى كونتسەرتتىڭ بيلەتتەرى كوز ىلەسپەس جىلدامدىقپەن ءوتىپ جاتقانىنا وزدەرى دە تاڭعالىپ قالعانىن جاسىرمادى. ءىرى قالالاردا ءتىپتى انشلاگ بولىپ جاتقان كورىنەدى.