«Qaırat» tarıhynda alǵash ret Chempıondar lıgasynyń pleı-off kezeńine joldama aldy

Foto: fckairat

Almatynyń «Qaıraty» syrt alańda ótken sheshýshi matchta Bratıslavanyń «Slovanyn» penaltı serııasynda jeńip, klýb tarıhynda alǵash ret Chempıondar lıgasynyń pleı-off kezeńine joldama aldy, dep jazady qandastar.kz

Bul týraly Stan.kzaqparat agenttigi habarlaıdy.
Almatynyń «Qaıraty» syrt alańda Bratıslavanyń «Slovanyn» jeńip, Chempıondar lıgasynyń irikteý kezeńiniń úshinshi aınalymynan pleı-offqa ótti. Qarymta kezdesý «Narodny» stadıonynda ótip, negizgi jáne qosymsha ýaqyttan keıin esep ózgermedi, al jeńimpazdy penaltı serııasy anyqtady. Nátıjesinde qazaqstandyq klýb 4:3 esebimen basym tústi.

Oıyn basynda alań ıeleri belsendilik tanytty, biraq esep ashý múmkindigi aldymen qonaqtarǵa tıdi — Jorjınonyń soqqysy qaqpa mańdaıshasyna tıdi. 30-mınýtta Robert Mak qarsylastyń qateligin paıdalanyp, esep ashty. Kezdesý qarqyndy ótip, eki komanda da shabýylǵa jıi shyqty. Tartysty sátter kóp bolyp, tóreshi oıynshylarǵa birneshe sary qaǵaz kórsetti — «Slovan» segiz, «Qaırat» tórt eskertý aldy. Birinshi taımda almatylyqtar qorǵaýshysy Lýısh Mata jaraqat alyp, ekinshi taımda alańnan ketti.

Ekinshi kezeńde «Qaırat» shabýylyn kúsheıtti, biraq alań ıeleri qaýipti qarymta shabýyl uıymdastyryp, Maktyń soqqysy baǵannan keri qaıtty. Eki matchtyń qorytyndysy 1:1 bolyp, oıyn qosymsha ýaqytqa sozyldy. Ekstra-taımda gol soǵylǵan joq, alaıda «Qaırat» taǵy bir oıynshysynan aıyryldy, jaraqat alǵan Georgı Zarııa aýystyryldy.

Penaltı serııasynda qazaqstandyq klýbtyń oıynshylary myqtylyq tanytty. Sońǵy soqqyny Jorjıno dál oryndap, «Qaıratty» kelesi kezeńge shyǵardy. Bul — klýb tarıhyndaǵy alǵashqy penaltı serııasyndaǵy jeńis.

Pleı-off kezeńinde almatylyqtar Shotlandııanyń «Seltık» klýbymen kezdesedi. Birinshi oıyn 20 tamyzda Glazgoda, al qarymta match 26 tamyzda Almatyda ótedi.

Slovan (Bratıslava, Slovakııa) — Qaırat (Almaty, Qazaqstan) — 1:0 (1:0), qos. ýaq. 1:0, pen. 3:4
Gol: Mak, 30 (1:0)
Penaltı: Tolıch — 1:0, Gromyko — sala almady, Pokorny — 2:0, Martynovıch — 2:1, Kýharevıch — 3:1, Rıkardıno — 3:2, Mýstafıch — sala almady, Sorokın — 3:3, Barsegıan — sala almady, Jorjıno — 3:4
Birinshi oıyn — 0:1.