مادەنيەت
«قايراتتاي اسىل ازاماتتى قايرات رىسقۇلبەكوۆتەي اباقتىعا قاماماۋ كەرەك ەدى»: بەلگىلى اسابا قايرات نۇرتاسقا قولداۋ ءبىلدىردى
فوتو: اشىق دەرەككوز
قازاقستاندىق تانىمال اسابا رۋسلان ىسقاق قاماۋعا الىنعان ەسترادا جۇلدىزى قايرات نۇرتاسقا قاتىستى پىكىرىن ءبىلدىردى. اسابا ونەر يەسىن تەمىر تورعا قاماۋدى ۇلكەن قاتەلىك دەپ سانايدى. رۋسلان ىسقاق بەلگىلى تەلەجۇرگىزۋشى اننا دانچەنكوعا بەرگەن سۇحباتىندا بۇل داۋلى ماسەلە جونىندە ءوز ويىن ايتتى. ول قايرات نۇرتاسقا قولداۋىن ءبىلدىرىپ, ونى قاماۋعا الۋ شەشىمىنە قارسىلىق تانىتتى.
توي جۇرگىزۋشىسى ءانشىنى اباقتىعا جابۋدىڭ ورنىنا «توبەمىزگە كوتەرۋىمىز كەرەك ەدى» دەيدى.
«قازاقتىڭ باعىنا بىتكەن قايراتتاي اسىل ازاماتتى قايرات رىسقۇلبەكوۆتەي اباقتىعا قاماۋ قاتەلىك بولدى. مەن بۇعان تىكەلەي قارسىمىن. قازاقتىڭ قايراتىن توبەمىزگە كوتەرۋىمىز كەرەك ەدى. بۇل ءبىزدىڭ قايرات, وزگەنىڭ قايراتى ەمەس. ەكى دوستىڭ اراسىندا بولعان جاعدايدى وسىنداي دەڭگەيگە دەيىن ۋشىقتىرماۋ كەرەك ەدى. ءالى دە ءبىزدىڭ زاڭعا, زاڭنامالىق اكتىلەرگە وسى ماسەلەلەردىڭ بارلىعىن تاعى دا ءبىر قاراستىرۋ كەرەك سياقتى. سەبەبى ونەر ادامىنىڭ قوعامعا زيانى جوق. كىمدى قاماۋ كەرەك? قوعامعا زيانى بار ادامدى, قىلمىسكەردى قاماۋ كەرەك. ەڭ بىرىنشىدەن, قايرات – ونەر ادامى. قاتەلەسپەيتىن پەندە بولمايدى, كەز كەلگەن ادام قاتەلەسەدى. جوعارى جاقتا وتىرعان ادامدار دا قاتەلەسەدى. سوندىقتان قايراتتى قاماۋ – وتە ۇلكەن قاتەلىك بولدى دەپ ويلايمىن. ەكى ادام بىتىمگەرشىلىككە كەلسە, نە ءۇشىن قامايمىز? ەكەۋى ءبىر-ءبىرىن كەشىردى. نەگە قايرات سياقتى ازاماتتارىمىزبەن تۇرمەنى تولتىرۋىمىز كەرەك? وسى ماسەلە مەنى قاتتى قىنجىلتادى», – دەدى ول.
