«Qaırattaı asyl azamatty Qaırat Rysqulbekovteı abaqtyǵa qamamaý kerek edi»: belgili asaba Qaırat Nurtasqa qoldaý bildirdi

Foto: ashyq derekkóz

Qazaqstandyq tanymal asaba Rýslan Ysqaq qamaýǵa alynǵan estrada juldyzy Qaırat Nurtasqa qatysty pikirin bildirdi. Asaba óner ıesin temir torǵa qamaýdy úlken qatelik dep sanaıdy. Rýslan Ysqaq belgili telejúrgizýshi Anna Danchenkoǵa bergen suhbatynda bul daýly másele jóninde óz oıyn aıtty. Ol Qaırat Nurtasqa qoldaýyn bildirip, ony qamaýǵa alý sheshimine qarsylyq tanytty. 

Toı júrgizýshisi ánshini abaqtyǵa jabýdyń ornyna «tóbemizge kóterýimiz kerek edi» deıdi.

«Qazaqtyń baǵyna bitken Qaırattaı asyl azamatty Qaırat Rysqulbekovteı abaqtyǵa qamaý qatelik boldy. Men buǵan tikeleı qarsymyn. Qazaqtyń Qaıratyn tóbemizge kóterýimiz kerek edi. Bul bizdiń Qaırat, ózgeniń Qaıraty emes. Eki dostyń arasynda bolǵan jaǵdaıdy osyndaı deńgeıge deıin ýshyqtyrmaý kerek edi. Áli de bizdiń zańǵa, zańnamalyq aktilerge osy máselelerdiń barlyǵyn taǵy da bir qarastyrý kerek sııaqty. Sebebi óner adamynyń qoǵamǵa zııany joq. Kimdi qamaý kerek? Qoǵamǵa zııany bar adamdy, qylmyskerdi qamaý kerek. Eń birinshiden, Qaırat – óner adamy. Qatelespeıtin pende bolmaıdy, kez kelgen adam qatelesedi. Joǵary jaqta otyrǵan adamdar da qatelesedi. Sondyqtan Qaıratty qamaý – óte úlken qatelik boldy dep oılaımyn. Eki adam bitimgershilikke kelse, ne úshin qamaımyz? Ekeýi bir-birin keshirdi. Nege Qaırat sııaqty azamattarymyzben túrmeni toltyrýymyz kerek? Osy másele meni qatty qynjyltady», – dedi ol.