“ قايسار” فۋتبولشىسى: جالاقى ماسەلەسى شەشىلمەسە, چەمپيوناتتىڭ سوڭعى ويىندارىنا شىقپايمىز

فوتو: اشىق دەرەككوز

جالاقى كورمەگەندەرىنە ءۇش ايدىڭ ءجۇزى بولعان فۋتبولشىلار كۇنى كەشە «شاحتەرمەن» ويىن الدىندا بايكوت جاريالاپ, ماتچ بەلگىلەنگەن ۋاقىتتان 10 مينۋتقا كەش باستالدى, دەپ حابارلايدى   qandastar.kz dopmedia-عا سىلتەمە جاساپ.

اياقدوپشىلار قوردالانعان قارىز بويىنشا وبلىس باسشىلارىمەن بەتپە-بەت سويلەسىپ, ماسەلەنى جەتكىزبەيىنشە, الاڭعا شىقپايتىدارىن ايتىپ, نارازىلىق بىلدىرگەن. بىراق, لاۋازىمدى تۇلعالاردىڭ بىردە-بىرەۋى توبە كورسەتپەدى. تەك, «قايساردىڭ» ديرەكتورى سادىق مۇستافانىڭ وتىنىشىنەن كەيىن كوماندا ويىنعا شىقتى. كوڭىلى توق بولماسا دا قايسارلىقتار قوڭىر كۇزدىڭ سالقىنىنا قاراماستان ستاديونعا كەلگەن مىڭداعان جانكۇيەرگە كەرەمەت قۋانىش سىيلادى. قاراعاندىنىڭ «شاحتەرىن» 5-1 ەسەبىمەن تاس-تالقان ەتىپ, بيىلعى ماۋسىمداعى ەڭ ءىرى جەڭىسىنە قول جەتكىزدى.

بىراق, ءارى قاراي نە بولارى بەلگىسىز. جالپى بيىلعى ماۋسىمدا كوماندانىڭ ويىنىنا جانكۇيەرلەر ءدان ريزا. وكىنىشتىسى, اكىمدىكتەگىلەر كلۋبتىڭ مۇشكىل جاعدايىنا ەش الاڭدامايتىن سەكىلدى. ايتپەسە, قىزىلوردادا بۇرىن-سوڭدى بولماعان تىڭ دۇنيەلەردى جۇزەگە اسىرىپ, ميللياردتاعان قارجى تارتىپ جاتقان وبلىس اكىمى نۇرلىبەك نالىباەۆتىڭ «قايساردىڭ» قوردالانعان قارىزىن جابۋعا شاماسى جەتپەيدى دەگەنگە سەنۋ قيىن. ويتكەنى, كورشىلەس شىمكەنتتىڭ مەرى عابيت سىزدىقبەكوۆ «ورداباسىنىڭ» 5 ميلليارد تەڭگە بەرەشەگىن شەشىپ بەرگەندە, نۇرلىبەك ماشبەك ۇلى 400 ميلليونعا تارىعىپ قالماسى انىق.
ال جالاقىدان كۇدەرىن ۇزبەگەن فۋتبولشىلار وسى كەزگە دەيىن ايتىلعان قۇرعاق ۋادەگە تويدىق دەپ وتىر. ايلىعى اسىپ-تاسپاسا دا جاقسى ناتيجە كورسەتىپ, بىرىنشىلىكتە ءار ۇپاي ءۇشىن ارپالىسقان «قاسقىرلاردىڭ» شىدامى تاۋسىلعان سەكىلدى. ءوزىنىڭ اتى-ءجونىن جاريالاماۋدى سۇراعان كلۋب ويىنشىسى قارىز ماسەلەسى شەشىلمەسە, كوماندا چەمپيوناتتىڭ سوڭعى تۋر ويىندارىنا شىقپايتىنىن ايتىپ, جالاقىمىز تولەنبەسە ۋەفا-عا دەيىن ارىزدانامىز دەپ وتىر.