“ Qaısar” fýtbolshysy: jalaqy máselesi sheshilmese, chempıonattyń sońǵy oıyndaryna shyqpaımyz

Foto: ashyq derekkóz

Jalaqy kórmegenderine úsh aıdyń júzi bolǵan fýtbolshylar kúni keshe «Shahtermen» oıyn aldynda baıkot jarııalap, match belgilengen ýaqyttan 10 mınýtqa kesh bastaldy, dep habarlaıdy   qandastar.kz dopmedia-ǵa silteme jasap.

Aıaqdopshylar qordalanǵan qaryz boıynsha oblys basshylarymen betpe-bet sóılesip, máseleni jetkizbeıinshe, alańǵa shyqpaıtydaryn aıtyp, narazylyq bildirgen. Biraq, laýazymdy tulǵalardyń birde-bireýi tóbe kórsetpedi. Tek, «Qaısardyń» dırektory Sadyq Mustafanyń ótinishinen keıin komanda oıynǵa shyqty. Kóńili toq bolmasa da qaısarlyqtar qońyr kúzdiń salqynyna qaramastan stadıonǵa kelgen myńdaǵan jankúıerge keremet qýanysh syılady. Qaraǵandynyń «Shahterin» 5-1 esebimen tas-talqan etip, bıylǵy maýsymdaǵy eń iri jeńisine qol jetkizdi.

Biraq, ári qaraı ne bolary belgisiz. Jalpy bıylǵy maýsymda komandanyń oıynyna jankúıerler dán rıza. О́kinishtisi, ákimdiktegiler klýbtyń múshkil jaǵdaıyna esh alańdamaıtyn sekildi. Áıtpese, Qyzylordada buryn-sońdy bolmaǵan tyń dúnıelerdi júzege asyryp, mıllıardtaǵan qarjy tartyp jatqan oblys ákimi Nurlybek Nálibaevtyń «Qaısardyń» qordalanǵan qaryzyn jabýǵa shamasy jetpeıdi degenge sený qıyn. О́ıtkeni, kórshiles Shymkenttiń meri Ǵabıt Syzdyqbekov «Ordabasynyń» 5 mıllıard teńge bereshegin sheship bergende, Nurlybek Máshbekuly 400 mıllıonǵa taryǵyp qalmasy anyq.
Al jalaqydan kúderin úzbegen fýtbolshylar osy kezge deıin aıtylǵan qurǵaq ýádege toıdyq dep otyr. Aılyǵy asyp-taspasa da jaqsy nátıje kórsetip, birinshilikte ár upaı úshin arpalysqan «qasqyrlardyń» shydamy taýsylǵan sekildi. О́ziniń aty-jónin jarııalamaýdy suraǵan klýb oıynshysy qaryz máselesi sheshilmese, komanda chempıonattyń sońǵy týr oıyndaryna shyqpaıtynyn aıtyp, jalaqymyz tólenbese ÝEFA-ǵa deıin aryzdanamyz dep otyr.