جاڭالىقتار
قايتىس بولعان دونور ءتورت ادامنىڭ ءومىرىن ساقتاپ قالدى
فوتو:University Medical Center
قازاقستاندا كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا جۇرەك ترانسپلانتاتسياسى بويىنشا وتا جاسالدى. 6 ساعاتقا سوزىلعان كۇردەلى وپەراتسيا University Medical Center-پەن بىرلەسىپ بەلگىلى كارديوحيرۋرگ يۋري پيانىڭ جەتەكشىلىگىمەن جاسالدى, – دەپ حابارلايدى qandastar.kz دەنساۋلىق ساقتاۋ مينيسترلىگىنە سىلتەمە جاساپ.
دارىگەرلەر مي ءولىمىن انىقتاعاننان كەيىن, تۋىستارى قايتىس بولعان الماتى وبلىسىنىڭ تۋماسى 45 جاستاعى ەر ادامنىڭ ورگاندارىن الۋعا كەلىسىم بەرگەن. سونىڭ ارقاسىندا قازاقستاننىڭ 4 ازاماتىنىڭ ءومىرى, ولاردىڭ اراسىندا «ديلاتاتسيالىق كارديوميوپاتيا (ۋىتتى)» كۇردەلى جۇرەك اۋرۋىنا شالدىققان 43 جاستاعى ەر ادامنىڭ ءومىرى قۇتقارىلدى. 5 جىل بويى ەنەرگەتيكالىق سۋسىنداردى شامادان تىس تۇتىنۋى ءدارى-دارمەك تەراپياسىن قابىلدامايتىن جۇرەك قىزمەتى جەتكىلىكسىزدىگىنىڭ سوڭعى ساتىسىنا اكەلگەن.
ناۋقاستى ازداعان دەنە كۇشىنەن اۋا جەتىسپەۋى, 50 مەتر جۇرگەننەن كەيىن ەنتىگۋ, قالىپتى جاعدايدا, جاتقان كەزدە ەنتىگۋدىڭ جوعارىلاۋى, تەز شارشاۋ جانە جالپى السىزدىك مازالاعان. جاعدايىنىڭ ناشارلاۋى 2023 جىلدىڭ جەلتوقسانىنان باستاپ بايقالا باستادى.
«ەلىمىزدە كارديوحيرۋرگيا مەن كارديورەانيماتسيانىڭ دامۋ دەڭگەيى جۇرەكتى ترانسپلانتاتسيالاۋ وپەراتسيالارىندا وڭ ناتيجەلەرگە قول جەتكىزۋگە مۇمكىندىك بەرەدى. يۋري ۆلاديميروۆيچ باستاعان UMC كومانداسىنا كومەك پەن قولداۋ كورسەتكەنى ءۇشىن العىسىمىز شەكسىز. ورگانداردى ترانسپلانتاتسيالاۋ بويىنشا وپەراتسيالار مەديتسينا قىزمەتكەرلەرىنىڭ جوعارى بىلىكتىلىگىن تالاپ ەتەدى», – دەيدى كارديولوگيا جانە ىشكى اۋرۋلار عزي باسقارما توراعاسى مارات پاشيموۆ.
مارات ورىنباسار ۇلى دونوردىڭ تۋىستارىنا دا العىسىن ءبىلدىردى: «دونورلىققا ءوز ەركىمەن كەلىسىم بەرۋ, ادامداردىڭ ءومىرىن ساقتاپ قالۋعا دايىن بولۋ – ادامگەرشىلىك پەن مەيىرىمدىلىكتىڭ ۇلگىسى. ورگانداردى الۋعا كەلىسىم بەرگەن دونوردىڭ تۋىستارىنىڭ يگى ءىسى زور قۇرمەتكە يە.
ينستيتۋتتىڭ كارديوحيرۋرگيا بولىمشەسىنىڭ مەڭگەرۋشىسى رۇستەم تولەۋتاەۆ: «جۇرەكتى ترانسپلانتاتسيالاۋ – كۇردەلى وپەراتسيالاردىڭ ءبىرى, الايدا ءبىزدىڭ العان تاجىريبەمىز, داعدىلارىمىز, كلينيكامىزدىڭ تەحنيكالىق جاراقتاندىرىلۋى ونى جوعارى دەڭگەيدە ورىنداۋعا مۇمكىندىك بەرەدى», – دەپ اتاپ ءوتتى.
ايتا كەتۋ كەرەك, دونوردان ەكى بۇيرەك, وكپە, سونىمەن قاتار كوز قابىعى الىندى. بۇيرەك جەتىسۋ وبلىسىنىڭ تۇرعىنى 17 جاستاعى ناۋقاسقا ا. سىزعانوۆ اتىنداعى ۇلتتىق حيرۋرگيا عىلىمي ورتالىعىندا جانە استانالىق 18 جاستاعى پاتسيەنتكە University Medical Center-دە ترانسپلانتاتسيالاندى, وكپە – «UMC-تە قوستانايلىق 43 جاستاعى پاتسيەنتكە, كوز قابىعى كەراتوپلاستيكاسى – ەكى رەتسيپيەنتكە ترانسپلانتاتسيالاندى.
ايتا كەتەيىك, قازاقستاندا 2025 جىلعى 10 قاڭتاردا جۇرەك ترانسپلانتاتسياسىن كۇتۋ پاراعىندا 140 ەرەسەك ادام جانە 5 بالا تۇر.
