جاڭالىقتار
قالىڭ مالى — 10 ميلليون: قازاق قىزىنىڭ ۇزاتۋداعى ۆيدەوسى جەلىنى شۋلاتتى
جەلىدە قازاق قىزىنىڭ قالىڭ مالىنا 10 ميلليون تەڭگە بەرگەن اراب جىگىتىنىڭ ۆيدەوسىن جەلىنى شۋلاتتى, دەپ حابارلايدى qandastar.kz.
ۆيدەونى بەلگىلى جۋرناليست گۇلميرا ابىقاي Instagram-پاراقشاسىنا جۇكتەدى. كادردا ارابشا كيىنگەن ەر ادامنىڭ قالىڭدىقتىڭ اناسىنا سىرتىندا 10 ميلليون تەڭگە دەپ جازىلعان قالتانى كورۋگە بولادى. قىزدىڭ اناسى وعان باسىن ءيىپ, العىسىن جاۋدىرعان.
ال جەلىدەگىلەر ارابقا تۇرمىسقا شىعىپ جاتقان قازاق قىزىنا رەنجىپ, پىكىر بىلدىرگەن.
«ارابتىڭ الدىندا ءماز بولعان قازاق دە. «بۇلارعا اقشا بولسا بولدى» دەيتىن شىعار ارابتار. ولارعا 10 ميلليون تۇك ەمەس قوي. تەك قىزدىڭ ەرتەڭى نە بولادى, سونى ويلاۋ كەرەك?», «100 ميلليون بەرسە دە, قىزىمدى بەرمەس ەدىم. سوسىن ولىگىن تاپپاي قالاسىڭ. 10 ميلليون ءۇشىن باسىمدى دا يمەس ەدىم. قۇرسىن, كوز الدىڭدا جۇرگەنگە نە جەتسىن, سوناۋ ەل اسپاي», «اناسى نە ءماز بولىپ تۇر?», «ويبۋ, بايعۇس-اي, اقشا كورمەگەندەي», «قىزىن بەرىپ وتىر, نەگە باسىن يەدى?», «مەن نامىسسىزدىقتان باسقا دىم كورىپ تۇرعان جوقپىن!», «قۇرسىن, اناسى قىزىن ساتقانىنا ءماز عوي, سابىرمەن الۋعا بولادى عوي», «10 ميلليون ءۇشىن اناسى ءيىلىپ سالەم بەرىپ كەتتى-اۋ», — دەپ جازعان ولار.
ودان كەيىن قالىڭدىقتىڭ دا جاۋابى جاريالاندى.
«اينالايىن, وسەكشى قازاعىم. بۇل ۆيدەونىڭ تۇسىرىلگەنىنە 2 جىلداس استى. اللاعا شۇكىر, باقىتتى ءومىر ءسۇرىپ جاتىرمىز. اتا-انام تۋرالى جامان جازۋدىڭ, قارعاۋدىڭ قاجەتى جوق. وزدەرىڭ دە بالا-شاعا ءوسىرىپ وتىرسىڭدار, قارعىستارىڭ وزدەرىڭە اينالىپ كەلەدى, اۋىز مەنىكى دەپ كوپ وتتاي بەرمەڭدەر. وسىنداي پىكىر قالدىراتىن قازاقتار تۇرعاندا, جاۋ دا كەرەك ەمەس ەكەن», — دەپ جاۋاپ بەرىپتى قالىڭدىق.
