كامچاتكادا تاعى جەر سىلكىندى: بيلىك تسۋنامي قاۋپىن جاريالادى

فوتو: pixabay.com

ەۋرازيانىڭ سولتۇستىك-شىعىس بولىگىندە, رەسەي اۋماعىندا ورنالاسقان كامچاتكا تۇبەگىندە جەر سىلكىنىسى تىركەلدى. ءوڭىر بيلىگى تسۋنامي قاۋپىن جاريالادى, دەپ جازدى qandastar.kz

بۇل تۋرالى Stan.kz اقپارات اگەنتتىگى «سولودوۆ. كامچاتكا»ارناسىنا سىلتەمە جاساپ حابارلايدى.

كامچاتكا ولكەسىنىڭ گۋبەرناتورى ۆلاديمير سولودوۆ ءوزىنىڭ Telegram-كانالىندا جەر سىلكىنىسىنىڭ ماگنيتۋداسى 6,3 بولعانىن مالىمدەدى.

«وبلىس ورتالىعىندا ءدىرىل 4-6 بالعا سەزىلدى. تسۋنامي قاۋپى جاريالاندى. حالىقتان, اسىرەسە حالاكتىر جاعاجايىنا جانە باسقا دا تسۋنامي قاۋپى بار ايماقتارعا بارعاندا ەرەكشە ساق بولۋدى سۇرايمىز», – دەدى وبلىس باسشىسى.

ماماندار الەۋمەتتىك ماڭىزى بار نىساندار مەن تۇرعىن ۇيلەردى تەكسەرىپ جاتىر. قازىر قيراۋ نەمەسە ەلەۋلى زاقىم تۋرالى اقپارات جوق.

وڭىرلىك توتەنشە جاعدايلار باسقارماسى تسۋنامي تولقىندارىنىڭ تۇبەكتىڭ جاعالاۋىنا جەتۋى مۇمكىن ەكەنىن ەسكەرتتى, ەڭ بيىك تولقىن – 120 مەترگە دەيىن – ماياچنىي ءمۇيىسى مەن حالاكتىر جاعاجايى ماڭىندا كۇتىلەدى. حالىققا جاعالاۋدان الىس بولۋ ۇسىنىلدى.

اقش گەولوگيالىق قىزمەتى دە تسۋنامي قاۋپىن جاريالاپ, جەر سىلكىنىس ماگنيتۋداسىن 7,4 دەپ باعالادى. ولاردىڭ مالىمەتىنشە, جەر سىلكىنىسى پەتروپاۆلوۆسك-كامچاتسكيدەن 111 شاقىرىم قاشىقتىقتا بولىپ, وشاق تەرەڭدىگى 39,5 شاقىرىمدا بولعان.
ەسكە سالايىق, ءبىرىنشى جەر سىلكىنىسى بيىل 30 شىلدەدە كامچاتكادا بولعان ماگنيتۋداسى 8,8 ءىرى جەر سىلكىنىسىنەن كەيىنگى افتەرشوكتار بولدى. سول كەزدە بۇل كامچاتكاداعى سەيسموفوكالدى ايماقتا 1952 جىلدان بەرى ەڭ كۇشتى سىلكىنىس بولىپ, تسۋنامي كۋريل ارالدارىن باسىپ ءوتتى. سولتۇستىك-كۋريلسك قالاسىندا پورت پەن «الايد» بالىق ونەركاسىپ كاسىپورنى سۋ استىندا قالعان. جاراقات العاندار بولعان جوق.