كامەرا جوق جەردە, اياعىن بايلاپ, امينازين بەردى: تۇركىستانداعى پسيحيكالىق اۋرۋحانادا كىشكەنتاي قىز جۇكتى بولىپ قالعان

فوتو: اشىق دەرەككوز

تۇركىستان وبلىستىق پسيحيكالىق اۋىتقۋى بار جانداردى ەمدەيتىن اۋرۋحانادا بىلىق شىقتى, دەپ حابارلايدى qandastar.kz ينفورمبيۋروعا سىلتەمە جاساپ.

ەمدەۋ مەكەمەسىندە سانيتار ماماندار ناۋقاستاردىڭ جاعدايىن پايدالانىپ, ارام ويىن ىسكە اسىردى دەيدى شاعىمدانۋشىلار. ءتىپتى, كامەلەت جاسىنا تولماعان 17 جاستاعى بويجەتكەن جۇكتى بولىپ, تۇسىك جاساتتى دەپ وتىر. جابىرلەنۋشىلەردىڭ تۋىستارىنىڭ ايتۋىنشا پوليتسيا تەرگەۋدى ساعىزشا سوزىپ, كۇدىكتىلەردى دە ءالى ۇستاماعان.

بەت-ءجۇزىن كورسەتپەي, اتى-ءجونىن اتاماۋدى وتىنگەن كەلىنشەك تۇركىستان وبلىستىق پسيحيكالىق دەنساۋلىق ورتالىعىندا بولعان سۇمدىق جايتتى ايتىپ بەردى. سوزىنشە, شيزوفرەنيا دياگنوزىمەن ەمدەلىپ جاتقان 17 جاستاعى قىزىن مەكەمە قىزمەتكەرلەرى زورلاعان. بۇل جاعا ۇستاتار وقيعانى بويجەتكەننىڭ قۇرساعىنا ءسابي بىتكەندە بىراق ءبىلدىم دەيدى اناسى.

“ۋزيگە اپاردىم. سول كەزدە 10 اپتا 4 كۇن دەپ بەردى. ءبىر ەمەس ەكى ۋزيگە تۇسىردىك. قىزىم ايتتى تەرگەۋدە. تەمىر توسەككە, تەلەديدار بولمەسىندە, كامەراسى جوق جەردە اياق-قولىن تەمىر توسەككە بايلاپ, تارتىپ, ۇيىقتاتاتىن امينازين دەگەن ۋكولدى سالىپ تۇرىپ, ەكى سانيتار ىستەگەن ەكەن. كامەراسى جوق جەردە باسپالداقتا ىستەگەن ەكەن. تاعى چەرداكقا شىعارىپ ىستەگەن ەكەن”, – دەيدى جابىرلەنۋشىنىڭ اناسى.

وسى ورتالىقتا ەمدەلىپ جاتقان 21 جاستاعى تاعى ءبىر قىز قورلاندىم دەپ جاقىندارىنان كومەك سۇراعان ەكەن. اناسى بىردەن پوليتسيا شاقىرتىپ, ارىز جازعانىن ايتادى. ساراپتاما تاعايىندالعان. بىراق ءتارتىپ ساقشىلار ءۇش ايدان بەرى تەرگەۋدى جۇرگىزبەي, قول قۋسىرىپ وتىر دەيدى جابىرلەنۋشىنىڭ تۋىستارى.

“وسى ەكى سانيتاردىڭ ۇستىنەن ارىزدانعانبىز. قىلمىستىق ءىس قوزعالىپ, ەشقانداي ارەكەت ىستەپ جاتقان جوق. مەن بارماعان جەرىم قالمادى. جازۋىنداي جازىپ جاتىرمىن. كامەرانى دا بىزگە كورسەتپەدى عوي. ودان كەيىن امال جوق ادۆوكات جالدادىم. ادۆوكاتپەن بارىپ, كامەرانى الدىق. بىراق ونى كورۋگە ماعان مۇمكىندىك بەرمەدى. مۇمكىن اراسىندا وزدەرى تازالاپ ءوشىرىپ تاستاعان شىعار. نە تەرگەۋشى كورسەتپەيدى”, – دەيدى جابىرلەنۋشىنىڭ اناسى.

جۇيكە جۇيەسىندە اقاۋى بار ناۋقاستار جاتاتىن ورتالىقتىڭ باسشىلىعى سۇحبات بەرۋدەن باس تارتتى. ال, پوليتسيا «زورلاۋ» بابىمەن قىلمىستىق ءىس قوزعالىپ, تەرگەۋ جۇرگىزىلىپ جاتقانىن جەتكىزدى. بىراق ساراپتاما قورىتىندىسى ءالى شىقپاپتى.

“اتالعان ءىس بويىنشا قىلمىستىق ءىس قوزعالدى. ءتيىستى ساراپتامالار وتكىزىلۋدە. ناتيجەسى بويىنشا پروتسەسسۋالدى شەشىم قابىلداناتىن بولادى”, – دەيدى شىمكەنت قالاسى ءال-فارابي اۋدانى پوليتسيا باسقارماسىنىڭ باستىعى باتىر مىرزاگەلديەۆ.

جىندىحانادا زورلاندىم دەگەن ەكى ناۋقاس تا قازىر ۇيىندە. كامەلەت جاسىنا تولماي جۇكتى بولعان قىزىم جاساندى تۇسىك جاساتتى دەيدى اناسى. ال ناۋقاستاردىڭ جاقىندارى ەندى بالالارىمىزدى پسيحيكالىق دەنساۋلىق ورتالىعىنا جىبەرمەيمىز دەپ وتىر. ولار كىنالىلەردىڭ ءتيىستى جازاسىن العانىن قالايدى.