«Qan túkirip jatsa da, bir balasy kelmedi»: Nurqadilovamen bir palatada jatqan áıel shyndyǵyn jazdy

Foto: vıdeodan kadr

Quralaı Nurqadilova anasy Nurbıke Ilimbaıqyzy qaıtys bolǵanda Astanada edi. Áleýmettik jelige vıdeo júktegen ol anasynyń qazasyna baılanysty shuǵyl túrde Almatyǵa ushqaly otyrǵanyn aıtqan bolatyn. Onyń osy postyna pikir qaldyrǵan Gúzal Musaeva esimdi áıel Nurbıke Ilimbaıqyzy sońǵy eki kúnde qatty qınalyp, qan qusqanyn jazyp ketken, dep habarlaıdy qandastar.kz aqparat portaly Azattyq Rýhy saıtyna silteme jasap.

«Anańyzdy birinshi qalalyq aýrýhanadaǵy bizdiń palataǵa ákelip jatqyzdy. Eki kún jatty, qatty aýyrdy, qatty qınaldy. Qasynda ne sý beretin adam joq, ne oramalmen betin súrtetin adam joq. «Sý berińdershi, salfetka berińdershi, dáriger shaqyryp berińdershi» dep árqaısymyzǵa jalyndy. Bul kisini aýrýhanaǵa bir kelinshek ákelip jatqyzyp, ketkenshe asyqty. «Sizge dári ákelip beremin» dep ketti, sodan qaıtyp kelmedi. Apa «kelinim ǵoı» dedi. Kútim bylaı tursyn, eki kún boıy artynan eshkim izdep kelgen joq, telefon soqqan joq. Qan túkirip jatty. Búkil bolnıa qatty tań qaldy. Aqyry keshke qaraı reanımaııaǵa alyp ketti. Qatty qınalǵan baıqus apanyń sońǵy kúnderinde bir de bir balasy qasynda bolmaǵany ókinishti. Bul jaǵdaı kóp nárseni oılandyrady», – dep jazǵan Gúzal Musaeva.

Al búgin áleýmettik jelige shyqqan Quralaı Nurqadilova Astanaǵa oralǵanyn, alaıda, páterinen tórt kún eshqaıda shyǵa almaı, qatty kúızeliske túskenin aıtqan.

«Psıhologııaǵa jaqyn adammyn…kezinde koronavırýstan keıin jaqynynan kenet aıyrylǵan talaı adamdy jubatyp edim. Qazir endi ózimniń kúıime ózim járdemshi bolyp jatyrmyn. Oıym bólinsin dep jumysqa aralasa bastadym», – deıdi Quralaı Nurqadilova.