كانادادا 25 مىڭنان استام ادام ءۇيىن تاستاپ كەتۋگە ءماجبۇر بولدى

كانادادا ورشىگەن ورمان ورتتەرى سالدارىنان 25 مىڭنان استام تۇرعىن ءوز ۇيلەرىن تاستاپ كەتۋگە ءماجبۇر بولدى. تابيعي اپات البەرتا, مانيتوبا جانە ساسكاچەۆان پروۆينتسيالارىندا بەلەڭ الىپ وتىر, دەپ حابارلايدى Qandastar.kz Sky News اگەنتتىگىنە سىلتەمە جاساپ.

كانادالىق ۆەدومستۆوارالىق ورمان ورتتەرى ورتالىعىنىڭ دەرەگىنشە, 30 مامىردا ەل اۋماعىندا 175-تەن استام ورمان ءورتى تىركەلگەن. قۇرعاق اۋا رايى مەن قاتتى جەل ءورتتىڭ جىلدام تارالۋىنا سەبەپ بولىپ, ونى ءسوندىرۋدى قيىنداتىپ وتىر. جەرگىلىكتى بيلىك باسقا وڭىرلەردەن ءورت سوندىرۋشىلەردى كومەككە شاقىردى.

ەڭ كوپ زارداپ شەككەن – مانيتوبا پروۆينتسياسى. مۇندا 17 مىڭ ادامعا ەۆاكۋاتسيا بۇيىرىلدى. ساسكاچەۆاندا 8 مىڭعا جۋىق, البەرتادا 1 300-دەن استام ادام قاۋىپسىز ايماقتارعا كوشىرىلدى. بۇدان بولەك, 29 مامىردا CBC News ساسكاچەۆاننىڭ پەليكان نارروۋز ەلدى مەكەنىندە 4 مىڭعا جۋىق تۇرعىن دالا ورتىنە بايلانىستى ەۆاكۋاتسيالانعانىن حابارلاعان ەدى.

كانادالىق بيلىك تۇرعىندارعا قاۋىپ سەيىلمەيىنشە ۇيلەرىنە ورالماۋعا كەڭەس بەرىپ وتىر. ورمان ورتتەرى كليماتتىق وزگەرىستەردىڭ سالدارى رەتىندە جيىلەپ بارادى, دەيدى ماماندار.