QANDAS MÁRTEBESIN ALÝ EREJESI TAǴY О́ZGERDI

Qos azamattyqqa jol berilmeıdi. Búgin senatta osy máselege qatysty tıisti zań birinshi oqylymda maquldandy. Senatorlar qandas mártebesin berý rásimin jetildirýge baǵyttalǵan túzetýler usyndy.

Osyǵan oraı, Eńbek jáne halyqty áleýmettik qorǵaý mınıstrligine ulty qazaq ekenin aıqyndaý erejesin ázirleý jáne bekitý jónindegi ókilettigi beriledi. Sheshimdi arnaıy qurylǵan komıssııa qabyldaıdy. Sonymen qatar, ǵylymı dárejesi bar qandastarǵa da arnaıy jeńildikter kózdelgen. Ishki ister mınıstrliginiń deregine súıensek, byltyrdan beri 26 myń 800-den astam adam Qazaqstan azamattyǵyna qabyldandy. Onyń 20 myń 500-den astamy qandas. Aıta ketý kerek, 32 jyl ishinde Qazaqstanǵa 1 mln 128 myń etnıkalyq qazaq kelip, qandas mártebesin alǵan. Bul el halqynyń 5,6 paıyzyna teń.