جاڭالىقتار
قانداس مارتەبەسىن قالاي الۋعا بولادى?
قازاقستان رەسپۋبليكاسى اۋماعىنا ءوز بەتىمەن كەلگەن ەتنيكالىق قازاقتار قانداس مارتەبەسىن الۋ ءۇشىن ءوتىنىشتى مەملەكەتتىك كورپوراتسياعا بەرە الادى. وتىنىش بەرۋشى مىناداي قۇجاتتاردى بەرۋگە ءتيىس:
- ءوتىنىش;
- ءومىربايان (ەركىن نىساندا);
- ءوتىنىش بەرۋشىنىڭ جانە ونىڭ وتباسى مۇشەلەرىنىڭ (بار بولسا) جەكە باسىن كۋالاندىراتىن قۇجاتتاردىڭ كوشىرمەلەرى, نوتاريات كۋالاندىرعان قازاق نەمەسە ورىس تىلىندەگى اۋدارماسىمەن (تۋ تۋرالى كۋالىك, شەتەلدىك پاسپورت, ازاماتتىعى جوق ادامنىڭ كۋالىگى نەمەسە ەتنيكالىق قازاقتاردىڭ شىققان ەلدەرىنىڭ ارنايى ورگاندارىنىڭ باسقا دا رەسمي قۇجاتتارى);
- ءوتىنىش بەرۋشىنىڭ قانداس مارتەبەسىن بەرۋ نەمەسە ۇزارتۋ قاعيدالارى 2-تارماعىنىڭ 3) تارماقشاسىندا كوزدەلگەن شارتتارعا سايكەستىگىن بەلگىلەيتىن قۇجاتتاردىڭ كوشىرمەلەرى.
قانداس مارتەبەسىن بەرۋ وبلىستاردىڭ, نۇر-سۇلتان, الماتى جانە شىمكەنت قالالارىنىڭ جەرگىلىكتى اتقارۋشى ورگاندارى جۇزەگە اسىرادى.
جەرگىلىكتى اتقارۋشى ورگان ەتنيكالىق قازاقتارعا جانە ولاردىڭ وتباسى مۇشەلەرىنە قانداس مارتەبەسىن بەرۋ تۋرالى شەشىمدى ءوتىنىش جەرگىلىكتى اتقارۋشى ورگاندا تىركەلگەن كۇننەن باستاپ ءتورت جۇمىس كۇنى ىشىندە قابىلدايدى, قانداس كۋالىگىن بەرەدى نە قانداس مارتەبەسىن بەرۋدەن دالەلدى تۇردە باس تارتادى.
ەتنيكالىق قازاقتىڭ جەكە سايكەستەندىرۋ ءنومىرى بولعان جاعدايدا قۇجاتتاردى قاراۋ جانە قانداس مارتەبەسىن بەرۋ جالپى مەرزىمى ءۇش جۇمىس كۇنى ىشىندە جۇزەگە اسىرىلادى.
شەشكەننەن كەيىن جەرگىلىكتى اتقارۋشى ورگان قانداس مارتەبەسىن بەرۋ تۋرالى اقپاراتتى جانە قانداس كۋالىگىن مەملەكەتتىك كورپوراتسياعا جىبەرەدى. ناتيجەلەرىن العاننان كەيىن مەملەكەتتىك كورپوراتسيا قانداس كۋالىگىن بەرەدى نە قانداس مارتەبەسىن بەرۋدەن باس تارتىلعانى تۋرالى حابارلايدى.
جەرگىلىكتى اتقارۋشى ورگان:
1) ءوتىنىش بەرۋشى مەن ونىڭ وتباسى مۇشەلەرى (بار بولسا) قانداس مارتەبەسىن بەرۋ نەمەسە ۇزارتۋ قاعيدالاردىڭ 2-تارماعى 2) تارماقشاسىنا سايكەس كەلمەگەن;
2) ءوتىنىش بەرۋشى مەن ونىڭ وتباسى مۇشەلەرى (بار بولسا) قاعيدالاردىڭ 2-تارماعى 3) تارماقشاسىنا سايكەس كەلمەگەن;
3) ۇسىنىلعان قۇجاتتاردىڭ دايەكسىزدىگى فاكتىسى انىقتالعان كەزدە قانداس مارتەبەسىن بەرۋدەن باس تارتادى.
قازاقستان رەسپۋبليكاسىنىڭ شەگىنەن تىس جەردە تۇراتىن ەتنيكالىق قازاقتار قانداس مارتەبەسىن الۋعا ءوتىنىشتى قازاقستان رەسپۋبليكاسىنىڭ شەتەلدەگى مەكەمەلەرىنە بەرەدى.
وتىنىشكە مىناداي قۇجاتتار قوسا بەرىلەدى:
- ءومىربايان (ەركىن نىساندا);
- ءوتىنىش بەرۋشىنىڭ جانە ونىڭ وتباسى مۇشەلەرىنىڭ (بار بولسا) جەكە باسىن كۋالاندىراتىن قۇجاتتاردىڭ كوشىرمەلەرى, نوتاريات كۋالاندىرعان قازاق نەمەسە ورىس تىلىندەگى اۋدارماسىمەن (تۋ تۋرالى كۋالىك, شەتەلدىك پاسپورت, ازاماتتىعى جوق ادامنىڭ كۋالىگى نەمەسە ەتنيكالىق قازاقتاردىڭ شىققان ەلدەرىنىڭ ارنايى ورگاندارىنىڭ باسقا دا رەسمي قۇجاتتارى);
- ءوتىنىش بەرۋشىنىڭ قانداس مارتەبەسىن بەرۋ نەمەسە ۇزارتۋ قاعيدالارى 2-تارماعىنىڭ 3) تارماقشاسىندا كوزدەلگەن شارتتارعا سايكەستىگىن بەلگىلەيتىن قۇجاتتاردىڭ كوشىرمەلەرى.
قازاقستان رەسپۋبليكاسىنىڭ شەت ەلدەگى مەكەمەلەرى ءوتىنىش بەرۋشىگە وسى قاعيدالاردىڭ 7-قوسىمشاسىنا سايكەس نىسان بويىنشا قانداس مارتەبەسىن بەرۋگە جەرگىلىكتى اتقارۋشى ورگاننىڭ كەلىسىمىن الۋ تۋرالى ونىڭ ءوتىنىشىن كىرىس حات-حابار رەتىندە تىركەۋ تۋرالى جازباشا حابارلاما بەرەدى جانە ءوتىنىش پەن قۇجاتتاردى زاڭنىڭ 20-بابىنا سايكەس شەشىم قابىلداۋ ءۇشىن حالىقتىڭ كوشى-قونى ماسەلەلەرى جونىندەگى ۋاكىلەتتى ورگانعا جىبەرەدى.
حالىقتىڭ كوشى-قونى ماسەلەلەرى جونىندەگى ۋاكىلەتتى ورگان جەرگىلىكتى اتقارۋشى ورگاننىڭ قانداس مارتەبەسىن بەرۋگە كەلىسۋ تۋرالى نە سەبەپتەرى دالەلدى تۇردە نەگىزدەلگەن باس تارتۋ تۋرالى شەشىمىن ءوتىنىش بەرۋشىگە جىبەرۋ ءۇشىن قازاقستان رەسپۋبليكاسىنىڭ شەت ەلدەگى مەكەمەلەرىنە جىبەرەدى.
قازاقستان رەسپۋبليكاسىنىڭ شەت ەلدەگى مەكەمەلەرى جەرگىلىكتى اتقارۋشى ورگاننىڭ قانداس مارتەبەسىن بەرۋگە كەلىسىمىن العاننان كەيىن ءبىر اي ىشىندە ونى ءوتىنىش بەرۋشىگە جىبەرەدى نە باس تارتۋ تۋرالى حابارلايدى.
قانداس مارتەبەسىن الۋعا جەرگىلىكتى اتقارۋشى ورگاننىڭ كەلىسىمىن العان ءوتىنىش بەرۋشى جانە ونىڭ وتباسى مۇشەلەرى (بار بولسا) قانداس مارتەبەسىن الۋ ءۇشىن تۇرعىلىقتى جەرىنە كەلگەننەن كەيىن قاعيدالاردىڭ 2-قوسىمشاسىنا سايكەس مەملەكەتتىك كورسەتىلەتىن قىزمەت ستاندارتىنىڭ مەملەكەتتىك قىزمەتىن كورسەتۋ ءۇشىن قاجەتتى قۇجاتتار تىزبەسىندە كورسەتىلگەن قۇجاتتاردى قوسا بەرە وتىرىپ, قاعيدالاردىڭ 1-قوسىمشاسىنا سايكەس نىسان بويىنشا مەملەكەتتىك كورپوراتسياعا نە جەرگىلىكتى اتقارۋشى ورگانعا جۇگىنەدى.
بەيىمدەلۋ جانە ينتەگراتسيالىق قىزمەتتەرىن كورسەتۋ ءۇشىن قانداستاردىڭ بەيىمدەلۋ جانە ينتەگراتسيا ورتالىقتارى قۇرىلىپ جاتىر.
ورتالىقتا ۋاقىتشا نەگىزدە تۇرۋ ءۇشىن قانداستار, سونداي-اق ولاردىڭ وتباسى مۇشەلەرى تەگىن ورنالاستىرىلادى. ورتالىقتا جەدەل قانداستاردىڭ قوعامعا بەيىمدەلۋى مەن ينتەگراتسياسىنا باعىتتالعان جاعداي جاسالۋدا. قانداستاردىڭ بەيىمدەلۋ جانە ينتەگراتسيا ورتالىقتارىندا قانداستار مەن ولاردىڭ وتباسى مۇشەلەرىنىڭ تۇرۋ ءتارتىبى مەن مەرزىمدەرىن, سونداي-اق ولارعا بەيىمدەلۋ جانە ينتەگراتسيالىق قىزمەتتەرىن كورسەتۋ ءتارتىبىن حالىقتىڭ كوشى-قونى ماسەلەلەرى جونىندەگى ۋاكىلەتتى ورگان ايقىندايدى.
قىزمەتتىك نەمەسە جەكە تۇرعىن ءۇي بولماعان جاعدايدا, قانداستار قانداستاردىڭ بەيىمدەلۋ جانە ينتەگراتسيا ورتالىقتارىندا, ۋاقىتشا ورنالاستىرۋ ورتالىقتارىندا ءبىر جىلدان ارتىق ەمەس مەرزىمگە ۋاقىتشا تىركەلە الادى.
