Qandastar kómekke muqtaj

Almaty qalasy Ishki saıasaty basqarmasy qoldaýymen «Adyrna» ulttyq-etonografııalyq birlestiginiń uıymdastyrýymen «Otan ottan da ystyq» qandastar  jobasy iske qosylǵandyǵyna kóp bola qoımady. Osy turǵyda zerttep kórgenimizdeı kóship kelgen qandastardyń eń birinshi utylatyny ol zańdy durys bilmeýi, óz quqyǵyn talap etpeýi eken.

Qazirgi ýaqytta QHR dan Qazaqstanǵa kelip oqyp jatqan qanshama stýdent bar. Biraq sol stýdentterdiń kóbi jazǵy úsh aı demalysta Qytaıǵa qaıta almaı otyr. Basty sebep Qytaıdaǵy saıası ahýaldyń kúrdelenip turǵany. Búginde Qazaqstannyń ár qalasynan  kelgen stýdentter Almaty qalasyna jınalǵan, sol stýdentterdiń tálimgeri Qydyráli Orazuly biraz stýdentterdi bastap «Adyrna»  ulttyq -etonografııalyq birlestiginiń  «Otan ottan da ystyq» jobasy men tanysýǵa ári joba aıasynda zańgerlik kómek suraı kelgendi.

«2018 jyldyń qysqy demalysynda Qytaıǵa ketken 97 stýdenttiń bes altysy ǵana keldi»- deıdi Qydyráli Orazuly.

«Qalǵanyn QHR da jeke qujattaryn alyp qoıyp, úı qamaqta otyr. Keıbiriniń ata-anasy saıası qýdalaýǵa ushyraǵandyqtan tipti túrmege túskenderi de bar. Osy máseleni eskerip bıylǵy  jazǵy úsh aıda balalardy elge jibermedik. Oqýyn aıaqtap alsyn dep qazirgi kezde barlyǵyn «Ata jurt» eriktiler uıymy bas bolyp,  Almaty qalasynda jınap otyrmyz. Bir aıdan keıin óz oqýlaryna jatahanalaryna qaıtady.  Al týysy barlary óz týystarynda turady. Barlyq stýdentter osy elde qalyp azamattyq alǵysy keledi, osy eldiń azamaty bolǵysy keledi.  Biraq «oralman kýáligi»  ýaqytynyń tym tyǵyzdyǵyna baılanysty ýaqytyn ótkizip alyp jatyr. Joǵarǵy jaqqa usynys retinde «oralman kýáliginiń» ýaqyty ótkenderge kómek surap hat joldaǵan edik. Jaýap retinde «oralman kýáliginiń»  ýaqyty,  tek úsh aı merzimin de  ótkenderge ǵana qaıta tapsyrýǵa bolatyndyǵy jaıly zań shyqty. Bul zań shyǵyp bitkenshe,  aldy jyldan asyp ketken oralman kýáliginiń ıeleri kóbeıip ketti. Qazir de «oralman kýáliginiń»  ýaqyty ótkender tek «yqtııarhatpen»  júr. «Yqtııarhattyń»  ýaqyty 5 jyl kóleminde ǵana, sonda «bes jyldan keıin qaıta kelgen jaǵyńa qaıtasyń»-,  dep tur ǵoı. Al ol jaqta kimdi ne kútip turǵanyn aıtý qıyn. Taǵy bir másele tirkeý,  ata-anasy  týǵan týysy áli Qytaıda turyp jatqandyqtan eshkimdi tanymaıtyn jastar, Kóshi qon polıııasyn  jaǵalap júrgen deldaldarǵa jem bolyp jatyr. Bizdiń tarapymyzdan usynysymyz jatahanadaǵy tirkeýimen «yqtııarhatpen» azamattyq alatyn zań shyqsa jas balalar biraz qıynshylyqtan qutylar edi.  О́zim de QHR dan alǵash kelgen de deldaldarǵa jem bolyp,  biraz sabaq boldy. Keıde osy deldaldar aqsha men qujatty alyp alady da,  ne jumys bitpeıdi, qujattyń da ýaqytyn óltirip alady. Bizde qazir 76 bala bar, barlyǵy  demeıin biraq kóbi osy deldaldan teperish kórip otyr,  tezdetip azamattyq alyp qalyp qalǵysy kelip deldaldarǵa  urynyp jatyr.  Aramyzda kámilettik jasqa endi tolǵandar bar, ata-anasyn saǵynbaıdy dep oılaısyz ba, árıne saǵynady.  Kórmegenderine eki úsh jyldan asyp barady. Biraq barlyǵy elin de otanyn da qalǵysy keledi».

Qazirde «Ata jurt» eriktiler uıymynyń kómegimen jatahanada turyp jatqan taǵdyry ár túrli 76 bala bar. Barlyǵy kómekke muqtaj, azamattyqqa tapsyrǵysy keledi. Biraq qoldan keler qaıran joq.  Degenimen «Otan ottan da ystyq» jobasyn qolǵa alǵan uıym qarap jatpaq emes: «Biz osy qandastarymyzdyń máselesimen oblys kóleminde de kezdesýler uıymdastyryp, zańdyq turǵyda túsindirý jumystaryn bastap kettik. Qandastarymyzdyń máselesin sheshýge qoldan kelgenshe aıanbaımyz» -, deıdi joba jetekshisi Álisher Omar.

Aıda QOJMAMBETOVA