قانداستار ءتول مادەنيەتىن دارىپتەپ ءجۇر

بيىل ناۋرىز مەيرامىنىڭ دۇنيەجۇزىلىك ماتەريالدىق ەمەس مۇرالار تىزىمىنە ەنگەنىنە — 15 جىل. قازىر 30-دان استام مەملەكەت بۇل كۇندى كەڭ اۋقىمدا اتاپ وتەدى.

ءبىز ءۇشىن جىل باسى ناۋرىزدىڭ قۇندىلىعى ەرەكشە. حالىق مەرەكەسى يگى ۇردىستەردى قالىپتاستىراتىن كۇشكە اينالدى. كورشى ەلدەردەگى قانداستار دا مۇنداي جاڭاشىلدىقتان قالىس قالمايدى. شالعايداعى اعايىنعا ارنالعان اق داستارحان, سپورتتىق ويىندار سايىسى مەن كونتسەرتتىك باعدارلاما. وزبەكستانداعى قاراقالپاق جەرىنىڭ قازاقتارى ءۇشىن بۇل ادەتتەگى ناۋرىز ەمەس.

ۇلتتىق ءداستۇر جاڭعىرىپ, قايتا قالپىنا كەلگەن مەيرام. بۇعان دەيىن كورىسۋ كۇنى ولكەدە اتاپ وتىلە بەرمەيتىن. قانداستار سول ولقىلىقتىڭ ورنىن تۇزەگەن. ۇلتتىق كيىمدەرىن دە ماقتانا كورسەتىپ, مارقايىپ وتىر. ال بۇل — تاۋەلىباي ولكەسىنىڭ ونەرپازدارى. ناۋرىز تويىن اركەز ءان-جىرمەن ارلەيدى. ونىڭ ۇستىنە, قازاق فولكلورى كوپشىلىكتىڭ ەرەكشە قىزىعۋشىلىعىن تۋدىرا باستاعان. مۇنداعى جۇرت ءبىر-بىرىمەن تاتۋ.

ۇلت پەن ۇلىسقا بولىنبەيدى. قازاق, وزبەك, قاراقالپاق بولىپ, شىعىستىڭ جاڭا جىلىن اتاپ وتەدى. مۇقاعالي مارالوۆ, كەنيمەح اۋدانى مادەنيەت ءۇيىنىڭ قىزمەتكەرى: — ءانسامبلىمىز قازاقستاننان, كورشى ەلدەردەن كەلەتىن قوناقتارعا قىزمەت جاساپ كەلەمىز. ءوزىمىز ۇلتتىق داستۇرلەرىمىزدى كورسەتىپ, كوبىنە وسى اتا-بابامىزدىڭ حالىق اندەرىن ورىنداپ كەلەمىز. ءاز-ناۋرىزدا تاشكەنت قازاقتارى دا بىرەگەيلىگىن ساقتاپ كەلەدى. اسىرەسە ۇلتتىق كيىم جانە اسپاپپەن ورتالىق الاڭعا بەتتەيتىن جاستار كوپ. سول ارقىلى ءتول مادەنيەتىن دارىپتەيدى. جىل جەمىستى بولسىن دەگەن تىلەكپەن كوپشىلىككە ءان ايتىپ, ونەرلەرىن كورسەتەدى. قازاقستان مەن وزبەكستان باستاپقىدا-اق ۇلىق مەيرامدى يۋنەسكو-نىڭ ماتەريالدىق ەمەس مۇرالار تىزىمىنە ەنگىزۋ ءۇشىن كوپ كۇش جۇمسادى. بىرىگىپ ارەكەت ەتتى. قازىر ناۋرىز بۇكىل الەمدە حالىقارالىق جاڭارۋ كۇنى رەتىندە تانىلعان.

ال جەر-جەردە ۇيىمداستىرىلاتىن مادەني شارالار باۋىرلاس ەلدەردى جاقسىلىققا ۇندەپ, يگى ىستەرگە ۇيىستىرۋشى كۇشگە اينالعانداي.