قانداستاردى الداعان مەملەكەتتىك قىزمەتكەرلەر سوتتالدى

فوتو: shutterstock

پاۆلودار وبلىسىندا قازاقستانعا قونىس اۋدارعان قانداستاردىڭ باسپاناسىنا بولىنگەن قارجىلاي كومەكتەن اقشا ۇرلاعان ەكى ادام سوتتالدى. ولار 144 ملن تەڭگە جىمقىرعان, دەپ جازدى qandastar.kz kursiv.media-عا سىلتەمە جاساپ.

بۇل تۋرالى باس پروكۋراتۋرانىڭ ءباسپاسوز قىزمەتى حابارلايدى.

وسى وڭىردەگى ۋسپەن اۋداندىق سوتى «قۋاتتى وڭىرلەر – ەل دامۋىنىڭ درايۆەرى» مەملەكەتتىك باعدارلاماسى اياسىندا بولىنگەن بيۋدجەت قاراجاتىن ۇرلاۋ بويىنشا قىلمىستىق ءىستى قارادى.

پروكۋرورلار «ەڭبەك موبيلدىگى ورتالىعى» مەكەكەمەسىنىڭ قىزمەتىن تەكسەرگەن. سوت بارىسىندا وسى مەكەمەنىڭ «ۋسپەن اۋدانى مانساپ ورتالىعى» فيليالىنىڭ قىزمەتكەرلەرى باعدارلاماعا قاتىسۋشىلاردى الداعانى انىقتالدى.

«ايىپتالۋشىلار ادەيى جالعان نۇسقاۋ بەرىپ, تومەن باعامەن ءۇي تابۋدى تالاپ ەتكەن. ال ساتىپ الۋ-ساتۋ كەلىسىمشارتىندا جوعارى باعا كورسەتىلگەن — 8 ملن تەڭگە. قونىس اۋدارۋشىلار, ايىپتالۋشىلاردىڭ نۇسقاۋىمەن, باعا ايىرماسىن سولارعا بەرگەن», – دەپ حابارلادى قۇزىرلى مەكەمە.

پروكۋراتۋرا مالىمەتىنشە, ولار وسىنداي الاياقتىق ارەكەتتەرمەن بيۋدجەت قاراجاتىن زاڭسىز يەمدەنىپ وتىرعان. قۇزىرلى ورگان مەكەمە قىزمەتكەرلەرى مەملەكەتكە 144 ملن تەڭگە زالال كەلتىردى دەپ ەسەپتەيدى.

«سوت ەكى ايىپتالۋشىنى كىنالى دەپ تانىدى: بىرىنە — 5 جىل باس بوستاندىعىنان ايىرۋ جازاسى تاعايىندالدى, ەكىنشىسىنە — 3 جىل شەكتەۋ جازاسى كەسىلدى», – دەپ حابارلادى باس پروكۋراتۋرا.

سوت ۇكىمى ءالى كۇشىنە ەنگەن جوق. سوتتالۋشىلار شەشىمگە شاعىمدانا الادى.

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, 2024 جىلى قانداس مارتەبەسىن 18 مىڭنان اسا ەتنيكالىق قازاق العان. 1991 جىلدان بەرى قازاقستانعا 1 ملن 146 مىڭ ەتنيكالىق قازاق ورالعان.