Qandastardy aldaǵan memlekettik qyzmetkerler sottaldy

Foto: shutterstock

Pavlodar oblysynda Qazaqstanǵa qonys aýdarǵan qandastardyń baspanasyna bólingen qarjylaı kómekten aqsha urlaǵan eki adam sottaldy. Olar 144 mln teńge jymqyrǵan, dep jazdy qandastar.kz kursiv.media-ǵa silteme jasap.

Bul týraly Bas prokýratýranyń baspasóz qyzmeti habarlaıdy.

Osy óńirdegi Ýspen aýdandyq soty «Qýatty óńirler – el damýynyń draıveri» memlekettik baǵdarlamasy aıasynda bólingen bıýdjet qarajatyn urlaý boıynsha qylmystyq isti qarady.

Prokýrorlar «Eńbek mobıldigi ortalyǵy» mekekemesiniń qyzmetin teksergen. Sot barysynda osy mekemeniń «Ýspen aýdany mansap ortalyǵy» fılıalynyń qyzmetkerleri baǵdarlamaǵa qatysýshylardy aldaǵany anyqtaldy.

«Aıyptalýshylar ádeıi jalǵan nusqaý berip, tómen baǵamen úı tabýdy talap etken. Al satyp alý-satý kelisimshartynda joǵary baǵa kórsetilgen — 8 mln teńge. Qonys aýdarýshylar, aıyptalýshylardyń nusqaýymen, baǵa aıyrmasyn solarǵa bergen», – dep habarlady quzyrly mekeme.

Prokýratýra málimetinshe, olar osyndaı alaıaqtyq árekettermen bıýdjet qarajatyn zańsyz ıemdenip otyrǵan. Quzyrly organ mekeme qyzmetkerleri memleketke 144 mln teńge zalal keltirdi dep esepteıdi.

«Sot eki aıyptalýshyny kináli dep tanydy: birine — 5 jyl bas bostandyǵynan aıyrý jazasy taǵaıyndaldy, ekinshisine — 3 jyl shekteý jazasy kesildi», – dep habarlady Bas prokýratýra.

Sot úkimi áli kúshine engen joq. Sottalýshylar sheshimge shaǵymdana alady.

Eńbek jáne halyqty áleýmettik qorǵaý mınıstrliginiń málimetinshe, 2024 jyly qandas mártebesin 18 myńnan asa etnıkalyq qazaq alǵan. 1991 jyldan beri Qazaqstanǵa 1 mln 146 myń etnıkalyq qazaq oralǵan.