Qandasty sabyltqan «mártebe»

Sońǵy kezderi oralman taqyryby kúrdelilene, kúnnen kúnge ýshyǵa tústi. Sáıkesinshe keıbir quzyrly mekemeler men organdardy mezi etkeni de bar. Ne oń sheshimin tappaıtyn, naqty zań tetikterine saı kelmeıtin ár alýan máseleler kún ótken saıyn kóbeıip keledi. Oralmandar jaıly keshegi zań búginge, búgingi zań erteńge jaramaıtyn hálge jettik. Sebep kóp. Kún ótken saıyn qıyndyqtar da qubylyp keledi. Elmiz bolsa sonaý jyldardaǵy zań sheńberinde jumys atqarady. Saldarynan otbasy ekige jarylyp, biri sharasyz Qytaı asyp ary ketse, biri qashyp beri kelip jatqandar kóp. Kelip alyp, QR azamattyǵyn ala almaı sabylyp júrgenderi qanshama? Tipti, keshe qandastar ıgiligi úshin «oralman» dep bergen mártebeniń ózi, búgin bastaryna bále bolyp jabysqany ras. «Aıta aıta Altaıdy, Jamal apam qartaıdy» demekshi, Jamal apamyzdy qartaıǵan ústine qartaıtyp, «Adyrna» birlestigi jáne bir jıyn ótkizdi. Týra sol – «mártebe» haqynda. Jıynǵa dál osy oralman kýáliktiń saldarynan, arysy 2007-shi, berisi 2016 jyldan beri elimiz azamattyǵyn ala almaı júrgen 50-ge tarta qandasymyz keldi. Muńy bir, zary bólek. Keıbiri jemqorlarǵa jem bolǵan, endi biri deldaldarǵa kez bolǵan. Áıteýir ne kerek «súıikti» oralman kýálikteriniń ýaqyty ótip ketip, Qazaqstan Respýblıkasynyń azamaty degen «qurmetti» ataqqa qoldary jetpeı júrgender.
Másele bar. Túıitkil talqylandy hám anyqtaldy. Endi ne istemek kerek? «Adyrna» birlestiginiń qolynda máseleni birden sheshe salatyn múmkindik joq átteń! Áıtpegende jylap kelgen biraz qandastyń kóz jasyn súrtip, qolyna azamattyqty ustata salar edik. Jáne bir ókinishtisi jıynǵa shaqyrylǵan quzyrly organ ókilderi kele almaı qaldy. Áýelgi maqsat – qandastardyń qazirgi halyn óz kózderimen kórsin, et qulaqtary men estisin degen edik. «Kelisip pishken ton kelte bolmas» demekshi, mamandarmen kelise otyryp, joǵaryǵa hat joldasaq degenbiz. Iá onsyz solaı boldy. 50-ge jýyq aryz jazylyp, hat jobasy talqylandy. Tek quzyrly mekeme ókilinsiz. Biraq, elim dep kelgen ózekti jannyń muń-zaryna QR parlamenti qulaq asyp, ózekten teppeıdi degen úmittemiz. Aldaǵy ýaqytta sol hattar men ótinishterdi rettep, jınaqtap ózderińizge usynamyz. Jáne bul tek bizdiń jobamyzdyń basy ǵana. Endi eki aı ishinde budan da qordalanǵan máselelerdi zerttep, zerdelep, talqyǵa salamyz. Alaıda talqyǵa salyp qana qarap otyrý qandastardy qajytqan – «upaı jınaýdyń» bir túri ǵana. Sondyqtan belgili nátıjege qol jetkizgenshe toqtamaımyz degen maqsattamyz.
Esterińizge sala ketsek, osy jyldyń mamyr, maýsym aılarynan beri Almaty qalasy, Ishki saıasat basqarmasynyń qoldaýymen «Adyrna» birlestigi «Otan ottan da ystyq!» jobasyn qolǵa alǵan. Joba aıasynda qandastarǵa jumyspen qamtý jáne tildik, quqyqtyq kómek kórsetýdi, qujattaryna kómektesip, máselelerdi anyqtaýdy óz mindetterine alǵan-dy. Sondaı-aq, qandastarǵa quqyqtyq, aqparattyq baǵyttaǵy «qandastar.kz» saıty men jedel jeli telefonyn iske qosqan.
Qurmetolla MUHAMETHANULY, «qandastar.kz»