قاڭتار وقيعاسى: پرەزيدەنت رەزيدەنتسياسى مەن اكىمدىكتى باسىپ الدى دەپ ايىپتالعان 11 ادامعا ۇكىم شىقتى

«سوت 10 سوتتالۋشىنى قىلمىستىق كودەكستىڭ 272-بابىنىڭ 2-بولىگىنىڭ 1), 4), 8) 380-بابىنىڭ 3-بولىگى, 269-1-بابىنىڭ 3-بولىگىمەن كىنالى دەپ تانىدى. «راقىمشىلىق جاساۋ تۋرالى» قازاقستان رەسپۋبليكاسىنىڭ زاڭىن پايدالانىپ, ولاردىڭ ارقايسىسىنا 1 جىل 9 ايعا باس بوستاندىعىنان ايىرۋ جازاسى تاعايىندالدى. ءبىر سوتتالۋشى باپتىڭ 2-بولىگى بويىنشا كىنالى دەپ تانىلدى. 272 قك-ءنىڭ 380-بابىنىڭ 3-بولىگىنىڭ 1), 4), 8) تارماقتارىمەن, 269-1-بابىنىڭ 3-بولىگىمەن, 261-بابىنىڭ 3-بولىگىمەن جانە «راقىمشىلىق جاساۋ تۋرالى» قازاقستان رەسپۋبليكاسىنىڭ زاڭىن پايدالانا وتىرىپ, اقىرى 4 جىلعا باس بوستاندىعىنان ايىرىلدى», – دەپ حابارلادى الماتى سوتىنىڭ ءباسپاسوز قىزمەتى.

ولارعا 2022 جىلعى قاڭتار وقيعاسى كەزىندە جاپپاي تارتىپسىزدىكتەر مەن كۇزەتىلەتىن وبەكتىلەرگە شابۋىل جاساۋ جانە ولاردى باسىپ الۋ, سونداي-اق بيلىك وكىلدەرىنە كۇش قولداندى دەگەن ايىپ تاعىلدى,-دەپ حابارلايدى Qandastar.kz

ايىپتاۋشى تاراپتىڭ ايتۋىنشا, 2022 جىلدىڭ 4-5 قاڭتارىندا سوتتالۋشىلار اكىمدىككە, پرەزيدەنت رەزيدەنتسياسىنا جانە پوليتسيا عيماراتىنا كىرگەن. ۇشەۋى قوعامدىق ءتارتىپتى قالپىنا كەلتىرۋ شارالارىن جۇرگىزىپ جاتقان اسكەريلەر مەن قۇقىق قورعاۋ ورگاندارىنىڭ قىزمەتكەرلەرىنە كۇش قولدانعان.

«سوتتالۋشىلاردىڭ ءبىرى ەكى اسكەري كۋرسانتتاردى كەپىلگە الىپ, ولارعا جەڭىل جاراقاتتار اكەلدى. ايىپتالۋشىلار تاعىلعان ايىپتى جارتىلاي مويىندادى», – دەلىنگەن حابارلامادا.

جۋرناليست دانيار مولدابەكوۆ بۇل ءىس بويىنشا ۇكىم ۇنەمى كەيىنگە شەگەرىلىپ, اقىرى پروكۋرور سۇراعان مەرزىمنەن از بولىپ شىققانىن جازادى.

ايتا كەتەيىك, بۇعان دەيىن پروكۋرور 11 ايىپتالۋشىعا 10-12 جىل مولشەرىندە جازا سۇراعان ەدى.