جاڭالىقتار
«قاڭتار وقيعاسىنا دەيىن ورگاندار ساتىبالدىعا قاتىستى ارىزدى قابىلدامادى»: ساتىبالدىعا قاتىستى سوتتا كۋاگەردىڭ سوزىنە ەكى ايىپتالۋشى شۇيلىكتى
الماتىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا گۇلميرا ساتىبالدىعا قاتىستى سوت وتىرىسىندا جابىرلەنۋشى اباي ءجۇنىسوۆتىڭ كۇيەۋ بالاسى قايدار باتىربەكوۆ سويلەدى,-دەپ حابارلايدى Qandastar.kz
ول «سپ كازگەرستروي» جشس-دا 2019 جىلعا دەيىن ديرەكتور بولعان.
سوت پروتسەسى تۋرالى قىسقاشا
ايتا كەتەىك, بۇل سوت پروتسەسىندە ەكس-پرەزيدەنت نۇرسۇلتان نازارباەۆتىڭ جيەنى قايرات ساتىبالدىنىڭ بۇرىنعى ايەلى گۇلميرا ساتىبالدىعا قىلمىستىق كودەكستىڭ ءۇش بابى بويىنشا قۇقىق بۇزۋشىلىق جاسادى دەگەن ايىپ تاعىلىپ وتىر. گۇلميرا ساتىبالدىنىڭ بۇرىنعى كۇيەۋ بالاسى اباي ءجۇنىسوۆ ونىڭ نۇسقاۋىمەن 2019 جىلدىڭ 13 اقپانىنان شىلدەسىنە دەيىن التى اي بويى ءوز ەركىنەن تىس ۇيقاماقتا ۇستالعانىن ايتىپ, سوتقا جۇگىنگەن. سونىمەن قاتار ول قايرات ساتىبالدىنىڭ بۇرىنعى ايەلىن ولاردىڭ ورتاق بيزنەسى – Baur Kazakhstan اق اكتيۆتەرىن تارتىپ الدى دەپ ايىپتاپ وتىر. سوت پروتسەسى 3 ماۋسىمدا باستالدى جانە ءالى جالعاسىپ جاتىر.
- گۇلميرا ساتىبالدىعا قىلمىستىق كودەكستىڭ 126-بابى 3-بولىگىنىڭ 3-تارماعى (زاڭسىز باس بوستاندىعىنان ايىرۋ, اۋىر زارداپتارعا اكەپ سوقتىرعان الدىن الا ءسوز بايلاسۋ), 194-باپتىڭ 4-بولىگىنىڭ 2-تارماعى (زورلىق-زومبىلىق قولدانۋ قاۋپىمەن اسا ءىرى مولشەردە بوپسالاۋ) بويىنشا ايىپ تاعىلىپ وتىر.
- ونىمەن بىرگە ونىڭ قول استىندا جۇمىس ىستەگەن ءمادي باتىرشاەۆ قىلمىستىق كودەكستىڭ 126-بابى 3-بولىگىنىڭ 3-تارماعى (زاڭسىز باس بوستاندىعىنان ايىرۋ, اۋىر زارداپتارعا اكەپ سوقتىرعان الدىن الا ءسوز بايلاسۋ) ايىپتالىپ وتىر.
بۇگىنگى وتىرىستا نە ايتىلدى?
بۇگىنگى سوت وتىرىسىندا «سپ كازگەرستروي» جشس-دا 2019 جىلعا دەيىن ديرەكتور بولعان, جابىرلەنۋشى اباي ءجۇنىسوۆتىڭ كۇيەۋ بالاسى قايدار باتىربەكوۆ سويلەدى. ول اباي ءجۇنىسوۆتىڭ ءوز ەركىنەن تىس ۇيقاماقتا وتىرعانىن ايتتى.
“ول قاماۋدا ءوز ەركىمەن وتىرعان جوق. ادامنىڭ ءتۇر-تۇسىنەن جاعدايى قانداي ەكەنى كورىنەدى. مەن ابايعا بارعاندا ول ءابىرجىپ كەتكەن, ساقالى, شاشى ءوسىپ كەتكەن بولىپ تۇردى. ەڭسەسى ءتۇسىپ كەتتى. مەن ىلعي وعان بارعاندا ول ءبىر جاۋاپ ايتاتىن: مەن اقشا ۇرلاعان جوقپىن, بەرەتىن مۇلكىم جوق دەيتىن. وعان اقشانى, م ۇلىكتى قايتارسىن دەپ ايتاتىن. ال مەن بارىپ سۇراپ, «اقشام جوق, مۇلكىم جوق» دەپ وتىر دەپ كەلەتىنمىن. سول كەزدە گۇلميرا ساتىبالدى وندا تۋىستارىنىڭ مۇلكىن بەرسىن دەيتىن”, – دەدى باتىربەكوۆ.
سونىمەن قاتار كۋاگەر قاڭتار وقيعاسىنا دەيىن ساتىبالدىلار وتباسىنا قارسى ارىزداردى ەشقانداي ورگان قاراماعانىن ايتتى.
“ەشقانداي شارا قولدانىلمادى. قاڭتار وقيعاسىنا دەيىن ەشتەڭە جاسالمادى, تەك قاڭتاردان سوڭ ءىس تىركەلە باستادى. ەشقانداي ورگان ساتىبالدىعا قاتىستى ارىزداردى المادى, قارامادى. سەبەبى ءوزىمنىڭ اتىمنان بىرنەشە رەت ارىز جازعان ەدىم. تەك قاڭتاردان سوڭ سىبايلاس جەمقورلىققا قارسى ءىس-قيمىل اگەنتتىگىنەن مەنىڭ ارىزىم قابىلدانعانى تۋرالى حابارلاندى”, – دەدى ول.
قايدار باتىربەكوۆ 2019 جىلى قاڭتاردا گۇلميرانىڭ ايتۋىمەن جۇمىستان شىعارىلعان. سول كەزدە تالاپ بويىنشا Baur Kazakhstan-داعى قارىزدى وعان جازباق بولعان.
“مۇنىڭ ءبارى ءبىزدى وسى قارىزدارمەن قالدىرۋ ءۇشىن جاسالعان. Baur Development group بانككە قارىزدار بولدى. سونىڭ ءبىر بولىكتەرىن بىزگە جازباق بولدى. كەيىن ماعان قارىزدىڭ 0,5%-ى جازىلعانى, ال قالعان 99,5%-ى اباي جۇنىسوۆكە جازىلعانى انىقتالدى. 2019 جىلى جۇمىستان شىعاردا, 2 اقپاندا قول قويدىم. كومپانيانىڭ مورلەرىن, ەتسق-لارىن – ءبارىن تاپسىردىق. سول كەزدە كومپانيا شوتىندا 12 ميلليارد اقشا بولعان. ول كەزدە مەنى ەشتەڭەگە ايىپتاعان جوق. ول كەزدە ماعان 3,5 ميلليارد تەنگە جازىلعانى تۋرالى ايىپ بولعان, كەيىن ول سوما 5 ملردقا ۇلعايتىلدى. بۇل ءىستى قايتا سارالاۋدىڭ سەبەبى, قىلمىستىق ءىستى قايتا قارادى, 13 ناۋرىزدا مەنى نەگىزسىز قامادى, سەبەبىن سۇراعاندا “باسشىلىقتان وسىنداي تاپسىرما ءتۇستى” دەدى. 6-رەت سوت وتىرىسى بولعاندا ءىستى توقتاتتى. مەن جاقتان ەشقانداي ۇرلىق, اقشا الۋ بولمادى. بىراق كومپانيالاردان انىعىن سۇراعاندا سوت وتىرىسى كەزىندە اۋديتورلىق كومپانيا وكىلى ەسەبىنەن باس تارتىلدى. باسقا كومپانيالارعا قاتىستى ءىس توقتاتىلعانى تۋرالى ايتىلعاندا كاكىشەۆ “بىزگە اقشا كەرەك ەمەس” دەدى”, – دەپ جاۋاپ بەردى قايدار باتىربەكوۆ.
گۇلميرا ساتىبالدى نەگە نارازى?
وسى كەزدە ايىپتالۋشى گۇلميرا ساتىبالدى كۋاگەردىڭ جاۋابىنا شۇيلىكتى.
“مەن نارازىمىن, مەن ولاي ايتقان جوقپىن. اقشا كەرەك ەمەس دەپ كىم ايتتى? قۇرمەتتى, سۋديا, ول شاتاستىرىپ جاتىر”, – دەدى گ.ساتىبالدى.
بۇل ىستە كۋاگەر باتىربەكوۆتىڭ ۇستىنەن 2020 جىلدىڭ قىركۇيەگىندە قىلمىستىق ءىس قوزعالعان. باتىربەكوۆ تەرگەۋ مەن سوت پروتسەسى ءجۇرىپ جاتقاندا قاماۋعا الىنعان. ءوزىنىڭ ايتۋىنشا, 2 جىل جازاسىن وتەگەن. 2024 جىلعى 24 ساۋىردە سوت ونى قىلمىستىق كودەكستىڭ 250-بابىنىڭ 1-بولىگىمەن («قىزمەت بابىن اسىرا پايدالانۋ») كىنالى دەپ تانىپ, قىلمىستىڭ مەرزىمى وتۋىنە بايلانىستى قىلمىستىق جاۋاپتىلىقتان بوساتقان.
ءمادي باتىرشاەۆ كۋاگەر باتىربەكوۆتىڭ ءسوزىن ءبولدى
بۇگىنگى سوتتا گۇلميرا ساتىبالدىنىڭ ادۆوكاتتارى مەن جاۋاپ بەرگەن قايدار باتىربەكوۆ سوزگە كەلىپ قالدى. سونىمەن قاتار ەكىنشى ايىپتالۋشى ءمادي باتىرشاەۆ تا باتىربەكوۆتىڭ جاۋاپتارىنا شۇيلىكتى.
ءمادي باتىرشاەۆ: تولىق ەمەس, ناقتى ەمەس, سەن دۇرىستاپ, انىقتاپ ءتۇسىندىرىپ ايتسايشى? نە جەتىسپەدى? ايتسايشى?
كۋاگەر باتىربەكوۆ: سەن نەگە ماعان سەن دەپ سويلەيسىڭ?
ءمادي باتىرشاەۆ: ەندى دۇرىستاپ ايتسايشى انىقتاپ?
ادۆوكات: باتىرشاەۆتىڭ اتىنان قانداي قوقان-لوقى بولدى?
كۋاگەر باتىربەكوۆ: گۇلميرا ابايدى كومىپ تاستايمىز دەگەندەي ايتتى. جۇنىسوۆكە پسيحيكالىق قوقان-لوقى كورسەتىلدى, aيزيكالىق كۇش كورسەتەمىز دەپ قورقىتتى, سوسىن ول ءوز ەركىنەن تىس كولىككە وتىردى.
ءمادي باتىرشاەۆ: قۇرمەتتى سۋديا, دۇرىستاپ جاۋاپ بەرسىنشى مىناۋ! بىلاي قاعازعا قاراپ, بىزگە سىيلاستىق كورسەتىپ تۇرعان جوق.
سوت وتىرىسىنىڭ سوڭىندا ساتىبالدىنىڭ ادۆوكاتى اسەمگۇل دانيالوۆا سۋديادان باتىربەكوۆتىڭ بۇرىن قوزعالعان قىلمىستىق ىسىندەگى اۋديت ناتيجەسىن وسى ىسكە قوسۋدى سۇرادى. دانيالوۆانىڭ بۇل وتىنىشىنە جابىرلەنۋشىنىڭ ادۆوكاتى راشيد تەڭىزباەۆ قارسى بولدى. دەگەنمەن سۋديا ايىپتالۋشى تاراپتىڭ ءوتىنىشىن قاناعاتتاندىردى.
