«قانتوگىس بولماسىن». شەرزاتتىڭ اكەسى قازاقستاندىقتارعا شۇعىل ۇندەۋ جاسادى

فوتو: ۆيدەودان سكرينشوت

تالعاردا توبەلەس سالدارىنان قازا تاپقان شەرزات بولاتتىڭ اكەسى قارجاۋباي نۇرىموۆ قازاقستاندىقتارعا ۇندەۋ جاسادى, – دەپ حابارلايدى Qandastar.kz Massaget.kz تىلشىسىنە سىلتەمە جاساپ.

«قۇرمەتتى, قازاق ەلى! سىزدەردىڭ الدارىڭىزدا باسىمدى يەمىن! مەنى قولداپ, بالام ءۇشىن قول ۇشىن بەرىپ جاتقاندارىڭىزعا كوپ راقمەت! مەن قوناەۆتاعى الماتى وبلىسىنىڭ پوليتسيا دەپارتامەنتىنىڭ عيماراتىنا كەلدىم. ول جەردە ءىس وڭ جاعىنان قارالىپ جاتىر. بىزگە ادۆوكاتتار كومەكتەسۋدە. مارقۇم بولعان سالتاناتتىڭ اعاسىنىڭ دا (ايتبەك امانگەلدى) كومەگى بار. ول كىسىگە دە ەرەكشە راقمەت! العىسىم شەكسىز», – دەدى ول.

شەرزاتتىڭ اكەسى حالىقتان قانتوگىس بولماۋىن سۇرادى.

«ءوتىنىشىم بار, حالقىم. ەشقانداي ميتينگىگە, قانتوگىس بولماسىن. مەن بار جەردە ءبىر شوعىرلانعان ادامدار كەلىپ, سول ءساتتى مەنىڭ دۇشپاندارىم پايدالانۋى مۇمكىن. كوتەرىلىس جاساپ, مەنى اياقتان شالىپ, باۋىرىما قاستاندىق جاساۋ ءۇشىن سونداي بولۋى مۇمكىن. سول سەبەپتى حالقىم, ءوتىنىپ سۇرايمىن, ەشقانداي كوتەرىلىس ەمەس, ءوز قاعيدام: زاڭ اياسىندا دۇرىس, ءادىل شەشىم سۇرايمىن. ارتىق ەشتەڭە سۇرامايمىن. شىنى كەرەك, قانداي دا ءبىر اقپاراتتار بولىپ جاتسا, ءوزىم عانا بولىسەمىن. ۆيدەوجازباعا, اۋديوجازباعا, سۋرەتتەر, فوتولارعا سەنبەڭىزدەر. كىم كەلسە دە, قانداي جاعداي بولسىن, سويلەسە الام, ءوز باسىما جاۋاپ بەرە الام. ال وتباسىمنىڭ جەكە قاۋىپسىزدىگى ۋايىمداتادى», – دەدى قارجاۋباي نۇرىموۆ.

ونىڭ سوزىنشە, كۇدىكتىلەر بىرنەشە رەت قورقىتقان.

«مەنى ءبىر ەمەس, بىرنەشە رەت قورقىتتى. الىپ كەتۋلەر بولدى. تەلەفونمەن دە. «زاڭگەرمىز, ادۆوكاتپىز, بىرگە وقىپ ەدىك» دەپ كەلىپ, الداپ, مەنى دالاعا شاقىرىپ الىپ, قورقىتۋلار بولعانى راس», – دەدى مارقۇمنىڭ اكەسى.

وسى تۇستا ول اشىق سوتتى تالاپ ەتەتىنىن جەتكىزدى.

«حالقىمنان سۇرايتىنىم – ەش قان توگىلمەسىن. اشىق سوت بولۋىن تالاپ ەتەم. اشىق سوت بولسا, وڭ شەشىم بولادى. ەش ارانداتۋعا تۇسپەڭىزدەرشى. انالار جىلاماسىن, بالالاردىڭ قانى توگىلمەسىن. باۋىرلارىم, جىگىتتەر, اراندامايىقشى, الدانىپ قالمايىق. جوعارىداعى اعالار دا زاڭ اياسىندا قولعا الىپ جاتىر. ەرتەڭ استانادان, ءىىم-نەن ادام كەلەدى دەپ ايتىلدى. سول ايتارىم. بالام ءولدى. ەندى مەن باسقا بالالاردىڭ بولاشاعى جاقسى بولسىن دەپ تىلەيمىن. نيەتىم دە, ارمانىم دا وسى», – دەدى ول.

ايتا كەتەيىك, 4 قازانعا قاراعان ءتۇنى تالعاردا جانتۇرشىگەرلىك قىلمىس بولدى. قولىندا پىشاق پەن قارۋى بار ءبىر توپ جىگىت 16 جاستاعى شەرزات, اكەسى مەن اعاسىنا شابۋىل جاساعان.

شەرزاتتىڭ اكەسى جالعا دۇكەن الىپ, ساۋدا جاساۋمەن اينالىساتىن. ارتى ولىممەن اياقتالعان توبەلەس وسى دۇكەننەن باستالعان. ءبىر جىگىت دۇكەنگە كەلىپ, سىرا الىپ, اقشاسىن تولەمەي كەتە بارعان. شەرزاتتىڭ اكەسى سىرانىڭ اقشاسىن تولەۋدى تالاپ ەتكەن كەزدە جانجال تۋىنداعان.

شەرزات وسى ساتتە كليەنتتىڭ دۇكەننەن شىعىپ كەتۋىن سۇراعان. بىراق سىرا العان جىگىت دوستارىنا قوڭىراۋ سوعىپ, دۇكەنگە ءۇش كولىكپەن ءبىر توپ جىگىت كەلگەن. ءبىر توپ جىگىت شەرزاتتى تەپكىلەي باستاعان. بۇل ءساتتى تۇرعىندار ۆيدەوعا ءتۇسىرىپ العان. 10-سىنىپتا وقيتىن شەرزات اتا-اناسىنىڭ دۇكەنىنە كەزدەيسوق كەلگەن. سۋىق قارۋمەن كەلگەن بۇزاقىلار ەشكىمدى اياماپتى. قانسىراعان ءبىر وتباسىنىڭ مۇشەلەرى اۋرۋحاناعا جەتكىزىلگەن. كوپ ۇزاماي شەرزات جانساقتاۋ بولىمىندە كوز جۇمعان.

قازا تاپقان جىگىتتىڭ اتا-اناسى پوليتسەيلەر وقيعاعا قاتىستى ادامنىڭ ءبارىن ۇستاماعانىن ايتىپ, دابىل قاققان.

الماتى وبلىسىنىڭ پوليتسيا دەپارتامەنتى كامەلەتكە تولماعان بالانى ءولتىرۋ فاكتىسى بويىنشا پوليتسيا قىلمىستىق ءىس قوزعاعانىن حابارلادى. وقيعانىڭ بارلىق قاتىسۋشىلارى ۇستالدى جانە ۋاقىتشا ۇستاۋ يزولياتورىنا قامالدى.

وبلىستىق پروكۋراتۋرا وكىلدەرى بۇل وقيعا ءجىتى باقىلاۋدا ەكەنىن حابارلادى.