«قاپاستان شىقسا دا, قاناتى سىنباعان»: مۇحامەدجان تازابەك مۇرات ابدىلداعا قولداۋ ءبىلدىردى

فوتو: جەكە پاراقشادان الىندى

بەلگىلى تالىمگەر, ايتىسكەر اقىن مۇحامەدجان تازابەك ۇلتارالىق الاۋىزدىق تۋدىردى دەپ ايىپتالىپ, تۇرمەدەن شىققان مۇرات ءابدىلدانى كوپ ادامعا ۇلگى ەتتى. بۇل تۋرالى qandastar.kz Stan.kz اقپارات اگەنتتىگى حابارلايدى.

ايتىسكەردىڭ سوزىنشە, جەلى جۇلدىزى شىنايى بولمىسىمەن كوپشىلىكتىڭ جۇرەگىن جاۋلاپ العان.

“مۇرات ءابدىلدا – قاراپايىم حالىقتىڭ ناعىز وكىلى. ايتپەسە, ەلدەن ەرەكشە, جۇرتتان ارتىق ەشتەڭە ىستەگەن جوق. بىراق, كوپتىڭ شىنايىلىققا دەگەن سۇرانىسىنا جاۋاپ بەردى. جالپى, حالقىمىز وتىرىكتەن, جالعان قارىم-قاتىناستان شارشادى. كىم نە ايتسا دا “الداماسا ەكەن, شىنايى بولساق ەكەن” دەگەن اڭساۋ اركىنىڭ جۇرەگىندە تۇر. مۇرات سياقتى قاپاستان شىقسا دا قاناتى سىنباعان, مىنەزى مۇقالماعان, قاراپايىم حالىقتىڭ قامىن ويلاپ, كوكەيىندەگىسىن ءدال ايتاتىن باۋىرلارىمىز امان بولسىن!”, – دەدى پسيحولوگ.

ايتا كەتەيىك, جەلى جۇلدىزى “قوعام داۋىسى” پودكاستىنا سۇحبات بەرىپ, كىناسىن تولىق مويىنداعانىمەن, ارانداتۋشىلاردىڭ تورىنا ءتۇسىپ قالعانىن جاسىرماعان ەدى.

“بۇرىن سوڭدى تۇرمە كورمەگەنسىن, باسىندا قاتتى كۇيزەلىسكە ءتۇستىم. باسىما تۇسكەن ءىس ءتۇسىم سياقتى بولدى. بالاعات ءسوز ايتقانىم ءۇشىن, قامالىپ كەتتىم. نەگىزى, ارانداتۋشىلاردىڭ ءىسى بولدى. بەكەردەن بەكەر ەشكىمدى بوقتاپ سويلەمەيمىن. ارانداتۋشىلار شامايىڭا تيەتىن ءسوز ايتادى, سونداي كەزدە مەن دە ەسەمدى جىبەرمەيمىن. وزىمنەن دە قاتەلىك كەتتى. قامالعانىما ءوزىم عانا كىنالىمىن. ونەر ادامىنىڭ جۇرەگىنە سالماق بولاتىن جاعداي ءوتتى. اللا بارىنە تورەشى. قامالىپ كەتكەن قيىن ەكەن”, – دەگەن ەدى انشى.