Qar aralas jańbyr jaýady: Eldiń basym bóliginde kún raıy buzylady dep boljam jasaldy

Qar men nóser jańbyr Qazaqstanǵa qaıta oralady. Bul týraly aldaǵy seısenbi, 2025 jylǵy 27 mamyrǵa arnalǵan aýa raıy boljamynda aıtylady, dep habarlaıdy Skifnews.kz aqparat portaly «Qazgıdromet» RMK-nyń baspasóz qyzmetine silteme jasap.

Boljamǵa sáıkes, jaýyn-shashynsyz aýa raıy elimizdiń batysynda, soltústik-batysynda jáne ońtústiginde ǵana kútiledi.

«Respýblıkamyzdyń basym bóliginde atmosferalyq frontaldy bólikterdiń áserinen aýa raıynyń turaqsyz sıpaty kútiledi: naızaǵaı oınap, jańbyr jaýady, túnde oblystyń soltústiginde, shyǵysynda jaýyn-shashyn (jańbyr, qar), elimizdiń shyǵysynda qatty jaýyn-shashyn (jańbyr, qar), ońtústik-shyǵysta nóser jańbyr jaýady… Respýblıkamyz boıynsha ortaq tabıǵı qubylysqa jeldiń kúsheıýi jatady. Elimizdiń batysynda, ońtústiginde shańdy daýyl turady, soltústiginde, soltústik-batysynda, ortalyǵynda túnde jáne tańerteń tuman bolady».»Qazgıdromet» RMK

Sondaı-aq, kúndiz Jetisý oblysynyń Alakól kólderi aýdanynda soqqan jeldiń ekpini 30 m/s jáne odan da asady dep kútiledi.

«Túnde Soltústik Qazaqstan oblysynyń soltústik-shyǵysynda, Aqtóbe oblysynyń soltústiginde, Pavlodar, Shyǵys Qazaqstan oblystarynyń shyǵysynda, Qaraǵandy oblysynyń shyǵysynda, Abaı oblysynyń batysynda, soltústiginde, Aqmola, Qostanaı oblystarynyń shyǵysynda topyraq beti qatyp, 1-2°S sýyq bolady, úsik júredi dep kútiledi».»Qazgıdromet» RMK

Sonymen qatar, gıdrometeorologııalyq ortalyq mynandaı da qaýipti qubylystar týraly eskertedi:

• órt qaýpi joǵary — Jetisý oblysynyń shyǵysynda, Qyzylorda óńiriniń ortalyǵynda, soltústiginde, Mańǵystaý oblysynyń batysynda, Aqtóbe óńiriniń batysynda, ońtústiginde, Pavlodar oblysynyń shyǵysynda, ortalyǵynda, Jambyl oblysynyń soltústiginde, ońtústiginde, Batys Qazaqstan oblysynyń ońtústik-shyǵysynda, Atyraý óńiriniń batysynda, soltústiginde, shyǵysynda, Túrkistan oblysynyń ońtústiginde, Almaty oblysynyń ortalyǵynda, Abaı oblysynyń ońtústik-shyǵysynda;
• tótenshe órt qaýpi — Qyzylorda óńirinde, Túrkistan oblysynyń soltústiginde, shóleıtti, taý bókterindegi aýdandarynda, Jambyl oblysynyń batysynda, shyǵysynda, Qostanaı óńiriniń ońtústiginde, Aqtóbe oblysynyń ońtústik-shyǵysynda, Atyraý óńiriniń ońtústiginde, batysynda, Almaty oblysynyń soltústiginde, Pavlodar, Shyǵys Qazaqstan oblystarynyń ońtústik-shyǵysynda, Jetisý oblysynda, Abaı óńiriniń ońtústiginde jáne Ulytaý oblysynda.