الەۋمەت جانە قوعام
قاراعاندى اكىمىنە ەسكەرتۋ جاسالىپ, اۋدان باسشىسى جۇمىستان بوساتىلدى
ءىس-شاراعا اتالعان اگەنتتىكتىڭ اۋماقتىق بولىمشىلەرىنىڭ باسشىلارى, ورتالىق جانە جەرگىلىكتى اتقارۋشى ورگانداردىڭ اپپارات باسشىلارى, كادر قىزمەتىنىڭ قىزمەتكەرلەرى, ادەپ جونىندەگى ۋاكىلدەرى قاتىستى.
«2024 جىلدىڭ باسىنان باستاپ 497 تەكسەرۋ جۇرگىزىلدى, ونىڭ قورىتىندىسى بويىنشا 6 935 بۇزۋشىلىق انىقتالدى. تالداۋ ناتيجەلەرى, مەملەكەتتىك ورگاندار لاۋازىمدىق نۇسقاۋلىقتاردى ازىرلەۋ, مەملەكەتتىك قىزمەتشىلەرگە تارتىپتىك جازا قولدانۋ, مەملەكەتتىك اكىمشىلىك لاۋازىمعا ورنالاسۋعا كونكۋرستىق راسىمدەر جۇرگىزۋ جانە ت.ب. كەزىندە بۇزۋشىلىقتارعا جول بەرىلەتىنىن كورسەتتى», دەپ حابارلادى مەملەكەتتىك قىزمەت ىستەرى اگەنتتىگى 13 جەلتوقساندا.
اقتوبە جانە پاۆلودار وبلىستارىنىڭ مەملەكەتتىك ورگاندارىندا كونكۋرس راسىمدەرىن ءجيى بۇزۋعا جول بەرىلگەنى ناقتىلانادى.
تارتىپتىك تاجىريبەدەگى بۇزۋشىلىقتاردىڭ ىشىندە قىزمەتكەر بۇزۋشىلىق فاكتىلەرىمەن كەلىسپەسە دە, قىزمەتكەرلەردى قىزمەتتىك تەرگەۋ جۇرگىزبەستەن تارتىپتىك جاۋاپكەرشىلىككە تارتۋ فاكتىلەرى انىقتالدى. كەيبىر جاعدايلاردا قىزمەتكەرلەر تارتىپتىك كوميسسيانىڭ وتىرىستارى تۋرالى حاباردار ەتىلمەگەن. بۇل ولاردىڭ ءوزىن قورعاۋ مۇمكىندىگىن شەكتەپ, قۇقىعىن بۇزادى.
مەملەكەتتىك قىزمەتشىلەرگە تارتىپتىك جازا قولدانۋ كەزىندەگى بۇزۋشىلىقتاردىڭ باسىم بولىگى اۋىل شارۋاشىلىعى مينيسترلىگىندە, قارجى مينيسترلىگىنىڭ مەملەكەتتىك كىرىستەر كوميتەتىندە, سونداي-اق اقمولا, الماتى جانە پاۆلودار وبلىستارىنىڭ مەملەكەتتىك ورگاندارىندا انىقتالعان.
جۇمىس ۋاقىتى رەجيمىن ساقتاماۋ وزەكتى ماسەلەلەردىڭ ءبىرى بولىپ وتىر.
«مەملەكەتتىك قىزمەتشىلەر ءتيىستى راسىمدەۋسىز ۇستەمە جۇمىسقا تارتىلعان. ءوز كەزەگىندە, ۇستەمە جۇمىستىڭ ەسەپكە الىنباۋى قىزمەتكەرلەردىڭ ەڭبەك قۇقىقتارىنىڭ ساقتالۋىن باقىلاۋدى قيىنداتىپ, ولاردىڭ موتيۆاتسياسىنا تەرىس اسەر ەتۋى مۇمكىن. جاعداي جاقسارتۋ ءۇشىن اگەنتتىك باسشىلارعا, كادر قىزمەتتەرىنە جانە ادەپ جونىندەگى ۋاكىلدەرگە ارنالعان پراكتيكالىق قۇرال رەتىندە ادىستەمەلىك ۇسىنىمدارى بار مەملەكەتتىك قىزمەت سالاسىنداعى ءجيى جول بەرىلەتىن زاڭنامالىق بۇزۋشىلىقتار جيناعىن ازىرلەدى». مەملەكەتتىك قىزمەت ىستەرى اگەنتتىگىنىڭ ءباسپاسوز قىزمەتى
جيناقتا تەكسەرۋ بارىسىندا انىقتالعان بۇزۋشىلىقتاردىڭ ناقتى مىسالدارى, ولاردىڭ الدىن الۋ بويىنشا ۇسىنىستار كورسەتىلگەن. سونداي-اق كادرلىق قىزمەتتەر مەن ادەپ جونىندەگى ۋاكىلدەرگە ارنالعان مىسالدار, كەيستەر جانە قادامدىق ءىس-قيمىل الگوريتمدەرى ۇسىنىلعان.
سونداي-اق ادەپ جونىندەگى كوميسسيا وتىرىسىندا قاراعاندى قالاسىنىڭ جانە الماتى وبلىسىنا قاراستى ەڭبەكشىقازاق اۋدانىنىڭ اكىمدەرىنە قاتىستى تارتىپتىك ىستەر قارالدى.
«تەكسەرۋ بارىسىندا قاراعاندى قالاسى اكىمىنىڭ ارەكەتى الەۋمەتتىك جەلىلەردە ازاماتتار تاراپىنان سىنعا سەبەپ بولعاندىعى انىقتالدى. انىقتالعان فاكتىلەر نەگىزىندە كوميسسيا «ەسكەرتۋ» تۇرىندە تارتىپتىك جازا قولدانۋدى ۇسىندى. بۇدان باسقا, ەڭبەكشىقازاق اۋدانىنىڭ اكىمىنە قاتىستى تارتىپتىك ءىستى قاراۋ كەزىندە قۇقىققا سىيىمسىز قولداۋ كورسەتۋگە قاتىستى جەر قاتىناستارى سالاسىنداعى بۇزۋشىلىقتارعا, سونداي-اق ءتيىستى باقىلاۋدىڭ بولماۋىنان جەر قاتىناستارى سالاسىنداعى جۇيەلى بۇزۋشىلىقتارعا جول بەرىلگەنى انىقتالدى. بۇل ارەكەتتەر مەملەكەتتىك قىزمەتكە كىر كەلتىرەتىن تارتىپتىك تەرىس قىلىق رەتىندە سارالاندى, وسىلايشا ونى اتقاراتىن لاۋازىمىنان بوساتۋ تۇرىندە تارتىپتىك جازا قولدانۋ تۋرالى شەشىم قابىلداندى», دەلىنگەن اگەنتتىك حابارلاماسىندا.
