جاڭالىقتار
قاراعاندى وبلىسىندا اەس سالۋ ماسەلەسىنە قاتىستى قوعامدىق تالقىلاۋلار وتەدى
ازاماتتار تەحنولوگيالاردىڭ قاۋىپسىزدىگى جانە اتوم ەلەكتر ستانتسياسى قۇرىلىسىنىڭ الەۋمەتتىك-ەكونوميكالىق اسپەكتىلەرى بويىنشا سۇراقتار جولداي الادى,-دەپ حابارلايدى Qandastar.kz
قاراعاندى وبلىسىندا قازاقستاندا اتوم ەلەكتر ستانتسياسىن سالۋ ماسەلەسى بويىنشا قوعامدىق تالقىلاۋلار وتەدى, دەپ حابارلايدى وبلىس اكىمدىگىنىڭ ءباسپاسوز قىزمەتى.
«قازاقستاندا اتوم ەلەكتر ستانتسياسىن سالۋ ماسەلەسىن تالقىلاۋ ءۇشىن قاراعاندى وبلىسىندا رەفەرەندۋمعا دەيىن قوعامدىق تالقىلاۋلار وتكىزۋ جوسپارلانۋدا», – دەلىنگەن حابارلامادا.
قوعامدىق تالقىلاۋعا اتوم سالاسىنىڭ ماماندارى قاتىسادى.
«قوعامدىق تالقىلاۋلار كەزىندە ازاماتتار تەحنولوگيالاردىڭ قاۋىپسىزدىگى جانە اتوم ەلەكتر ستانتسياسى قۇرىلىسىنىڭ الەۋمەتتىك-ەكونوميكالىق اسپەكتىلەرى بويىنشا سۇراقتار جولداي الادى», – دەپ تولىقتىردى اكىمدىكتەگىلەر.
بۇعان دەيىن توقاەۆ اەس قۇرىلىسى بويىنشا رەفەرەندۋم كۇزدە وتەتىنىن مالىمدەگەن.
باق قىزمەتكەرلەرىن ماراپاتتاۋ راسىمىندە سويلەگەن سوزىندە ول «تۇراقتى ەنەرگيامەن قامتاماسىز ەتپەيىنشە ەكونوميكانى دامىتۋ مۇمكىن ەمەس ەكەنىن» ايتتى.
«سوندىقتان مەن اتوم ەلەكتر ستانتسياسىن سالۋ ماسەلەسىن پىسىقتاۋدى تاپسىردىم», – دەدى مەملەكەت باسشىسى.
توقاەۆ بۇل ماسەلەنىڭ كەڭىنەن تالقىلانىپ, ءتۇرلى كوزقاراستار ايتىلىپ جاتقانىن مالىمدەدى.
«راسىندا, ەلىمىزدە اتوم ەنەرگەتيكاسىن دامىتۋ ءۇشىن زور مۇمكىندىكتەر بار, ولاردى دۇرىس ءارى ءتيىمدى پايدالانۋ ماڭىزدى. بۇل ماسەلە بويىنشا تۇپكىلىكتى شەشىمدى حالىق قابىلدايدى. وسى كۇزدە وتەتىن رەفەرەندۋمنىڭ ناقتى كۇنىن ۇكىمەت انىقتايدى», – دەپ مالىمدەدى پرەزيدەنت.
