Jańalyqtar
Qaraǵandy oblysynda AES salý máselesine qatysty qoǵamdyq talqylaýlar ótedi
Azamattar tehnologııalardyń qaýipsizdigi jáne atom elektr stanııasy qurylysynyń áleýmettik-ekonomıkalyq aspektileri boıynsha suraqtar joldaı alady,-dep habarlaıdy Qandastar.kz
Qaraǵandy oblysynda Qazaqstanda atom elektr stanııasyn salý máselesi boıynsha qoǵamdyq talqylaýlar ótedi, dep habarlaıdy oblys ákimdiginiń baspasóz qyzmeti.
«Qazaqstanda atom elektr stanııasyn salý máselesin talqylaý úshin Qaraǵandy oblysynda referendýmǵa deıin qoǵamdyq talqylaýlar ótkizý josparlanýda», – delingen habarlamada.
Qoǵamdyq talqylaýǵa atom salasynyń mamandary qatysady.
«Qoǵamdyq talqylaýlar kezinde azamattar tehnologııalardyń qaýipsizdigi jáne atom elektr stanııasy qurylysynyń áleýmettik-ekonomıkalyq aspektileri boıynsha suraqtar joldaı alady», – dep tolyqtyrdy ákimdiktegiler.
Buǵan deıin Toqaev AES qurylysy boıynsha referendým kúzde ótetinin málimdegen.
BAQ qyzmetkerlerin marapattaý rásiminde sóılegen sózinde ol «turaqty energııamen qamtamasyz etpeıinshe ekonomıkany damytý múmkin emes ekenin» aıtty.
«Sondyqtan men atom elektr stanııasyn salý máselesin pysyqtaýdy tapsyrdym», – dedi memleket basshysy.
Toqaev bul máseleniń keńinen talqylanyp, túrli kózqarastar aıtylyp jatqanyn málimdedi.
«Rasynda, elimizde atom energetıkasyn damytý úshin zor múmkindikter bar, olardy durys ári tıimdi paıdalaný mańyzdy. Bul másele boıynsha túpkilikti sheshimdi halyq qabyldaıdy. Osy kúzde ótetin referendýmnyń naqty kúnin úkimet anyqtaıdy», – dep málimdedi prezıdent.
