جاڭالىقتار
قاراعاندى وبلىسىندا كامەلەتكە تولماعان قىزدارىنا ازعىندىق ارەكەتتەردى جاساۋعا رۇقسات بەرگەن انالارى قاماۋعا الىندى
فوتو: اشىق دەرەككوز
ءىىم كەزەكتى كەڭ اۋقىمدى «STOP-ترافيك» وپەراتسياسىن جۇرگىزدى. ءۇش كۇنگە جالعاسقان وپەراتسيا ناتيجەسىندە پوليتسەيلەر ادام ساۋداسىمەن, ادامداردى, ونىڭ ىشىندە كامەلەتكە تولماعانداردى جەزوكشەلىكپەن اينالىسۋعا تارتۋ, پريتوندار ۇستاۋ جانە جەڭگەتايلىق جاساۋعا بايلانىستى 40 قىلمىستى انىقتاعان, دەپ حابارلايدى qandastar.kz KAZ.NUR.KZ-كە سىلتەمە جاساپ.
اقپاراتتىق مەديا-پورتالدىڭ حابارلاۋىنشا, جەزوكشەلىكپەن اينالىسۋعا ارنالعان ءۇي-جايلار ۇسىنۋ بويىنشا 156 جانە قوعامدىق ورىنداردا ادامداردى مازالاۋ بويىنشا 640 اكىمشىلىك قۇقىق بۇزۋشىلىق تىركەلگەن.
«شىمكەنت قالاسى پوليتسيا دەپارتامەنتى ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى ءتورت ادامنان تۇراتىن توپتى ۇستادى. ولار ۇزاق ۋاقىت بويى 18 بەن 23 جاس ارالىعىنداعى قالا تۇرعىندارىن جالدامالى پاتەرلەردە جەزوكشەلىكپەن اينالىسۋعا تارتقان. كۇدىكتىلەر جابىرلەنۋشىلەردى ينتيمدىك فوتوسۋرەتتەرمەن بوپسالاپ وتىرعان. كورسەتىلگەن فاكتىلەر بويىنشا قك-ءنىڭ 308-بابى 2-بولىگى (جەزوكشەلىكپەن اينالىسۋعا تارتۋ) جانە قك-ءنىڭ 309-بابى 2-بولىگىنە (جەڭگەتايلىق) سايكەس ەكى قىلمىستىق ءىس تىركەلدى. كۇدىكتىلەر ۋاقىتشا ۇستاۋ يزولياتورىنا قامالدى», — دەلىنگەن حابارلامادا.
ودان بولەك الماتى قالاسىندا پوليتسيا قىزمەتكەرلەرى «بودي-ماسساج» سالوندارىن ۇيىمداستىرعان جەتى ازاماتشانى ۇستاپ, ولار ۋاقىتشا ۇستاۋ يزولياتورىنا قامالدى. سوتقا دەيىنگى تەرگەۋ جەڭگەتايلىق فاكتىلەرى بويىنشا جۇرگىزىپ جاتىر.
تۇركىستان وبلىسىندا وبلىس پروكۋراتۋراسىنىڭ ۇيلەستىرۋىمەن قىزىلوردا وبلىسىنىڭ 2007 ج.ت. جانە 2006 ج.ت. ەكى تۇرعىنى ۇستالدى. ولار Telegram الەۋمەتتىك جەلىسىنىڭ جابىق توپتارىندا كامەلەتكە تولماعانداردىڭ قاتىسۋىمەن پورنوگرافيالىق بەينەجازبالاردى ساتۋمەن اينالىسقان. بۇل فاكت قك-ءنىڭ 312-بابى 1-بولىگى بويىنشا سدتبت-نە تىركەلگەن (كامەلەتكە تولماعانداردىڭ پورنوگرافيالىق بەينەلەرى بار ماتەريالداردىڭ نەمەسە زاتتاردى دايىنداۋ جانە اينالىمى نە ولاردى پورنوگرافيالىق سيپاتتاعى ويىن-ساۋىق ءىس-شارالارىنا قاتىسۋ ءۇشىن تارتۋ) تىركەلگەن. ۇيىمداستىرۋشى ۋاقىتشا ۇستاۋ يزولياتورىنا قامالدى.
ودان بولەك, اباي وبلىسىندا اياگوز اۋدانىنىڭ تۇرعىنى وبلىستىڭ ەكى تۇرعىنىڭ شارۋا قوجالىقتارىنا ساتۋ دەرەگى انىقتالعان.
«وسى فاكت بويىنشا قك-ءنىڭ 128-بابى 1-بولىگىمەن (ادام ساۋداسى) سوتقا دەيىنگى تەرگەۋ باستالىپ, قىلمىستىق ىستەر قوزعالدى», — دەلىنگەن حابارلامادا.
قاراعاندى وبلىسىندا دا سۇمدىق جايتتىڭ بەتى اشىلدى. پد ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى 60 جاستاعى ەر ادام ۇستالدى. ول اقشالاي سىياقى ءۇشىن جاس قىزداردىڭ انالارىمەن ولارعا قاتىستى جىنىستىق سيپاتتاعى ازعىندىق ارەكەتتەردى ودان ءارى جاساۋ جانە بالالار پورنوگرافياسىن جازۋ ماقساتىندا كەلىسىمدەر جاساعان. بارلىق كۇدىكتى ۋاقىتشا ۇستاۋ يزولياتورىنا قامالدى. قك-ءنىڭ 121-بابى 4-بولىگى (كامەلەتكە تولماعاندارعا قاتىستى سەكسۋالدىق سيپاتتاعى زورلىق-زومبىلىق ارەكەتتەرى) جانە قك-ءنىڭ 135-بابى (كامەلەتكە تولماعاندار ساۋداسى) بويىنشا سوتقا دەيىنگى تەرگەپ-تەكسەرۋ باستالدى», — دەپ جازادى باسىلىم.
