جاڭالىقتار
قاراعاندى وبلىسىندا جەدەل جاردەم كولىكتەرىنە بەينەكامەرا ورناتىلدى
![](https://qandastar.kz/wp-content/uploads/2024/06/IMG_6647.webp)
قاراعاندى وبلىسىندا جەدەل جاردەم كولىكتەرىنە بەينەكامەرا ورناتىلىپ جاتىر. ويتكەنى وتكەندە ناۋقاستىڭ ۇيىنە كەلگەن دارىگەرلەردىڭ سوققىعا تۇسكەنى ءمالىم.
جالپى بىلتىر وڭىردە مەديتسينا قىزمەتكەرلەرى ەمدەلۋشىلەرمەن 46 رەت قاقتىعىسقا تۇسكەن. جەدەل جاردەم كولىگىنىڭ جۇرگىزۋشىسى سانات امانجولوۆ ەندى جولعا شىقپاس بۇرىن بەينەكامەرالاردىڭ جۇمىسىن تەكسەرەدى. باقىلاۋ جۇيەسى ءوزى جانە دارىگەرلەردىڭ قاۋىپسىزدىگى ءۇشىن قويىلعان. كولىكتى تىزگىندەگەن ەكى جىلدا مۇنداي جاڭاشىلدىق العاش رەت ەنگىزىلگەنىن ايتادى.
بەينەكامەرالار كولىك ءىشى مەن سىرتىن تاۋلىك بويى ءتۇسىرىپ, ساقتاي الادى. سانات امانجولوۆ, جەدەل جاردەم كولىگىنىڭ جۇرگىزۋشىسى: – ەندى كامەرالاردى باياعىدان كۇتتىك, كادىمگىدەي. ويتكەنى نەشە ءتۇرلى جاعدايلار بولادى. مىناۋ ءبىزدى قاراپ وتىراتىن كامەرا, مىناۋ جول ەرەجەسىن بۇزباۋ ءۇشىن الدىڭعى كامەرا, ارتتا ناۋقاستاردى قاراپ وتىرۋ ءۇشىن كامەرا, سوسىن ەڭ ارتىندا ول ارتتاعى بىرنارسە بولىپ قالسا, سونداي سيتۋاتسيانى قاراۋعا كامەرا تۇر. بۇل تاۋلىك بويى ساقتالاتىن ۆيدەو.
ول ۆيدەونى ديسپەتچەرلار قاراپ وتىرادى جانە ديسپەتچەرلار ساقتاپ وتىراتىن ۆيدەولار وسى. بىلتىر شۇعىل كومەك كورسەتۋ بريگادالارىنا 40-تان استام شابۋىل جاسالعان. ال كولىك جۇرگىزۋشىسىن سوققىعا جىعۋ دەرەگى بويىنشا سوت ءىسى ءجۇرىپ جاتىر. بۇدان بولەك مەديتسينا جابدىقتارىنا زاقىم كەلگەن جايتتار دا بار. سوندىقتان, كولىكتەردى بەينەكامەرالارمەن قامتۋ قاجەتتىلىكتەن تۋعان شارا.
سەرىك ورىنباساروۆ, وبلىستىق جەدەل مەديتسينالىق جاردەم ستانتسياسى ديرەكتورىنىڭ ورىنباسارى: – ونىڭ ءبىرىنشى ماقساتى جول ەرەجەسىن بۇزباۋعا, ساقتاۋعا ەكىنشى ماقساتى ناۋقاس پەن پاتسيەنتتەردىڭ قاۋىپسىزدىگى. بىرنەشە اۆتوكولىككە ول تەرەزەنى سىندىرىپ كەتتى. ءبىزدىڭ كولىكتىڭ جۇرگىزۋشىسىن سوعىپ كەتكەن جاعدايلار بولدى. مىنە وسىنداي جاعدايلاردى العا الۋ ءۇشىن ەرتەڭ سوت بولعان كەزدە دە دالەلدەۋ ءۇشىن وسى ۆيدەوكامەرا ورناتقان.
بۇگىندە 80 جەدەل جاردەم كولىگى بەينەباقىلاۋ جۇيەسىمەن قامتىلدى. ەندى, اۋداندارداعى تەحنيكالارعا قويىلادى. كامەرالار جۇرگىزۋشىنى دە ءتۇسىرىپ وتىرادى.
ەگەر جولدان شىعىپ كەتسە نەمەسە ۇيىقتاپ قالسا داۋىس زورايتقىش ارقىلى ەسكەرتۋ بەرەدى. جالپىلاي العاندا, بۇل شارا بريگادالاردىڭ قاۋىپسىزدىگىن قامتىپ قانا قويماي, ولاردىڭ جۇمىس ساپاسىن دا قاداعالايدى. انۋاربەك مىرزاتاي ۇلى, مارينا زولوتاريوۆا, سايران اكامباەۆ, زارينا زۋلپىحار