جاڭالىقتار
قاراعاندىدا 9-قاباتتىڭ بالكونىنان سەكىرمەك بولعان ەر ادام قۇتقارىلدى
قاراعاندىدا پوليتسەيلەر 9-قاباتتاعى بالكوننان سەكىرمەك بولعان ەر ادامدى امان الىپ قالدى, دەپ حابارلايدى Qandastar.kz اقپارات پورتالى.
وقيعا 5 ماۋسىم كۇنى تاتتىمبەت كوشەسىندە بولعان.
پوليتسيا مەن توتەنشە جاعدايلار قىزمەتىنىڭ جەدەل ءارى ۇيلەسىمدى ءىس-قيمىلىنىڭ ارقاسىندا 39 جاستاعى ازامات قۇتقارىلدى.
كوپقاباتتى ءۇيدىڭ توعىزىنشى قاباتىنداعى بالكوننىڭ سىرتىندا ارقانعا ءىلىنىپ تۇرعان ەر ادامدى كورگەن كۋاگەرلەر بىردەن قۇتقارۋ قىزمەتتەرىنە حابار بەرگەن.
پوليتسيا قىزمەتكەرلەرى مەن قۇتقارۋشىلار وقيعا ورنىنا جىلدام جەتىپ, شۇعىل ارەكەتكە كوشكەن.
قاراعاندى قالاسى وڭتۇستىك-شىعىس پوليتسيا ءبولىمى كريمينالدىق پوليتسيا بولىمشەسى باستىعىنىڭ ورىنباسارى ادلەت اميربەكوۆ ەر ادامدى اڭگىمەگە تارتىپ, ونى رايىنان قايتارۋعا تىرىسقان.
— ءبىز كەلگەندە ەر ادام وتە اۋىر پسيحولوگيالىق كۇيدە بولدى. قۇتقارۋشىلار ەسىكتى اشۋعا ارەكەتتەنىپ جاتقاندا, مەن بالكون سىرتىندا تۇرعان ونىمەن سويلەسۋگە تىرىستىم. ۋاقىت ساناۋلى ەدى. ارىپتەستەرىم تومەنگى قاباتتا ساقتىق شارالارىن باقىلاپ تۇردى. اقىرى ءبىر ساتتە ونى ىشكە قاراي تارتىپ ۇلگەردىك, — دەيدى ول.
